هفضل أحب الزمالك.. رسالة وداع من ناصر ماهر بعد انتقاله إلى بيراميدز
أعرب ناصر ماهر لاعب نادي الزمالك السابق والمنتقل حديثًا إلى نادي بيراميدز، عن مشاعره الصادقة لجماهير القلعة البيضاء، مؤكدًا أن رحلته مع النادي انتهت لكنها ستظل محطة مهمة في مسيرته الكروية.
رسالة وداع مؤثرة من ناصر ماهر بعد انتقاله إلى بيراميدز
وقال ناصر ماهر عبر حسابه الرسمي على إنستجرام: مش عارف أبدأ منين، لأن في حاجات مش سهلة تتقال خصوصًا لما تكون بتتكلم لجمهور عظيم زي جماهير الزمالك داخل القارة وخارجها.. اسمحولي أعبر عن حبي واحترامي ليكم… والله مش مجرد كلام.
وأضاف: من أول يوم دخلت فيه النادي وأنا حاسس إن المكان ده فيه حاجة تتحب، يمكن عشان ده كيان كبير، أو عشان لاعبين كبار وشخصيات محترمة بتتحمل أكتر من أي حد، أو عشان الجمهور المختلف بأجواءه ودعمه ومتعته، بس في الآخر الكرة ممكن تخليك تسيب مكان بتحبه، وده جزء من اللعبة أنا بحبكم جدًا والله.. النهارده آخر يوم ليا في نادي الزمالك، النادي اللي تشرفت إني ألبس التيشيرت التاريخي بتاعه، ودافعت عنه بكل إخلاص وحب، أنتم خلتوني نجم بجد، ودايمًا بقول إن ربنا أكرمني بجمهور الزمالك.
وواصل ناصر ماهر حديثه قائلا: يمكن الرحلة خلصت دلوقتي بسبب ظروف النادي الصعبة، وأتمنى أكون جزء ولو بسيط في حل الأزمة المالية، وأقدر أساعد النادي لأن الزمالك كبير ويستحق إن الواحد يضحي عشانه.. وبالنسبة لي، الرحلة لسه فيها فصل تاني إمتى؟ الله أعلم، وبشكر كل زملائي اللاعبين الرجالة بجد في كل المواقف، وبشكر إدارة نادي الزمالك برئاسة الكابتن حسين لبيب، وبشكر جميع المدربين اللي تدربت معاهم.. شكرا كابتن جون إدوارد، شكرًا كابتن عبد الناصر محمد، وشكرًا كابتن أحمد سليمان اللي خلاني أكون متواجد داخل نادي الزمالك، وكمان بشكر الأوفياء، جمهور الزمالك العظيم، الداعم الأول للنادي.
واختتم تصريحاته قائلًا: آخر حاجة هقولها، أنا دخلت النادي وقلت أنا بحب الزمالك، ودلوقتي وأنا ماشي بقول: هفضل أحب الزمالك.
