شقيق صاحب شركة تأجير السيارات المقتول بفيصل: كان بيصلح بين الناس ورجع جثة.. ويتيموا 3 بنات وولد
روى شقيق حازم حمدان، صاحب شركة تأجير السيارات الذي قتل في منطقة المطبعة بفيصل على يد صاحب مطعم سي جمبري وعماله، تفاصيل الفاجعة التي خطفت شقيقه بعد جلسة صلح لم يكن طرفًا فيها.
وقال شقيق الضحية: أخويا راح مني علشان قعدة صلح، ملوش أي دعوة بيها، واللي في مطعم سي جمبري المطبعة فيصل هما اللي قتلوه، وعلى رأسهم أحمد شندي صاحب المطعم.
شقيق صاحب شركة تأجير السيارات المقتول: أخويا كان العيلة كلها ويتيموا 3 بنات وولد
وأضاف: 3 بنات وولد بقوا أيتام، وأخويا مكانش بس كبير العيلة، ده كان العيلة كلها، أنا مش قادر أستوعب إزاي واحد ملوش ذنب في حاجة يروح بالشكل ده.
وتابع: أنا أصغر واحد في العيلة، وفجأة لقيت نفسي المسؤول عن الكل، والعيلة كلها بقت في رقبتي ومش عارف أعمل إيه ولا أتصرف إزاي.
وكان حازم حمدان قد توجّه لحضور جلسة صلح بين أحد أقاربه وعامل بالمطعم، إلا أنه عقب انتهاء الجلسة تعرّض لاعتداء جماعي من عدد من الأشخاص باستخدام أسلحة بيضاء، ما أسفر عن إصابته إصابة قاتلة أودت بحياته قبل وصوله إلى المستشفى.
وطالب أهل الضحية بسرعة محاسبة المتورطين وتحقيق العدالة، مؤكدين تمسّكهم بحق حازم بالقانون.
