أسرة المجني عليه صاحب شركة كيان لتأجير السيارات: صاحب مطعم سي جمبري جمع العمال وضربوه في العرق اللي واصل للقلب ومات
روى أحمد ربيع، ابن عمة المجني عليه حازم حمدان وشاهد العيان على الواقعة تفاصيل الساعات الأخيرة في حياة صاحب شركة كيان لتأجير السيارات، الذي لقي مصرعه خلال جلسة صلح أمام مطعم سي جمبري بمنطقة فيصل.
وقال أحمد ربيع في تصريحات خاصة لـ القاهرة 24: البداية كانت إن أخويا شغال في مطعم سي جمبري، وحصلت بينه وبين عامل هناك خناقة، وقتها الناس مسكوه وقالوا إنهم بيحوشوا، وضربوه وعوروه في رقبته وعدت على كده، ورحنا هناك نشوف الموضوع قال ده اتخانق مع راجل كبير قد أبوه ومشي ولو عايزين تيجوا تعالوا بكرة، وتاني يوم رُحنا للمحل علشان نحل المشكلة بالذوق، وقلنا ده راجل كبير ومش عايزين مشاكل.
مقتل صاحب شركة كيان لتأجير السيارات
وأضاف: إحنا كنا قاعدين قدام المحل ومستنيين صاحب المكان يوصل علشان نتصالح، وهو قال إنه جاي في الطريق، لكن الصنايعية فضلوا يشتموا فينا، وإحنا كنا ساكتين احترامًا لصاحب المحل.
وتابع ابن عمة المتوفى: أول ما وصل أحمد. ش صاحب مطعم سي جمبري، لقينا حوالي 14 واحد نزلوا علينا مرة واحدة، ماسكين سنج وسواطير وبواني، واستلموا حازم ضرب، وصاحب المحل ضربه في رجله لحد ما اتصاب في العرق اللي بيوصل للقلب.
وأكمل: فضلوا يضربوا فيه لحد ما وقع على الأرض، وإحنا مش عارفين نعمل حاجة من كتر العدد، ولما حاولنا ننقذه كان بينزف جامد.
وأوضح: نقلناه على طول لـ مستشفى الهرم، لكن للأسف مات بسبب الإصابة اللي جت في الوريد.
وأكد أحمد ربيع أن الأسرة تتهم صاحب المطعم بالمشاركة والتحريض على الاعتداء، قائلًا: إحنا متهمين أحمد. ش صاحب سي جمبري، هو اللي نزل والناس هاجت بعد ما وصل.
وتابع: حازم كان راجل محترم ومالوش في المشاكل، ومعاه أربع عيال صغيرين ملهمش غيره، وكان كل همه يخلص الخلاف بالصلح مش بالخناق.
واختتم حديثه بقوله: إحنا عايزين حق حازم بالقانون، لأنه مات غدر قدام المحل وهو رايح يصلح مش يتخانق.
وتباشر جهات التحقيق إجراءاتها في الواقعة، حيث تم التحفظ على المتهمين، وتفريغ كاميرات المراقبة، وانتداب الطب الشرعي لبيان سبب الوفاة بشكل رسمي.
