الفنانة زينة فى واقعة تعدي كلب على نجليها بالشيخ زايد: ماكنتش بطارد الطفل بعربيتي كنت بدور على أهله |خاص
قررت محكمة جنح الشيخ زايد في الجيزة، تأجيل محاكمة المتهمين في واقعة التعدي على نجلي الفنانة زينة بكلب، داخل كمبوند بالشيخ زايد إلى جلسة 28 فبراير، لاتخاذ إجراءات الرد.
أقوال الفنانة زينة فى واقعة تعدي كلب على نجليها بالشيخ زايد
وحصل القاهرة 24 على نص أقوال الفنانة زينة فى واقعة تعدي كلب على نجليها داخل كومبوند بالشيخ زايد حيث جاء بأقوال الفنانة زينة أمام جهات التحقيق كالتالي:
س: ما الذي حال منع حضورك جلسة التحقيق؟
ج: أنا كنت مع ولادي لأنهم كانوا تعبانين أوي وابني كان عنده ميعاد تطعيم خربشة الكلب.
س: ما سبب عدم حملك بطاقة تحقيق شخصية كونك حاضرة لجلسة تحقيق بسراي النيابة العامة؟
ج: أنا محفظتي كلها اتسرقت وفيها كارنيهاتي وبطاقتي وباسبوري.
س: اذكر لنا معلوماتك بشأن الواقعة محل التحقيق؟
ج: اللي حصل إن يوم ٢٥-٥-۲۰۲٥ حوالي الساعة 7 المغرب، أنا كنت رايحة البيت، وأولادي عز، وزين الدين، كانوا في ملعب الكورة، وأنا راجعة البيت لقيت اتصال جالي على تيلفوني من رقم أنا معرفوش.
وتابعت زينة خلال التحقيق: لما رديت ليقت ابني زين بيرد عليا وبيقولى الحقي يا ماما في كلب هجم علينا والولد صاحب الكلب سايبه علينا، فانا سألته معاكوا مين قالي أنا في الملعب وقلتله موبايل مين ده اللي بتتكلم منه قالي محمد الأمن، وسألته أخوك فين قالي الكلب هجم عليه في الملعب وقالى تعالي بسرعة، وأنا روحت عليهم وخدتهم ولقيت زين متعور في كتفه من الحديد بتاع سور الملعب، وعز الدين متخربش في رجله، وطلعت أجري علشان أشوف الأمن فين ورکبت ولادى الاتنين معايا وطلعت أجري بعربيتي بعد ما قعدتهم ورا علشان أدور على فرد الأمن.
وأضافت: كنت بجري علشان الحق فرد الأمن وأعرف إيه اللي حصل منه وفجأة لقيته واقف على جنب بالموتوسيكل ولما نزلت من العربية لقيته مع طفل، والطفل كان معاه كلب، وساعتها سألت إيه اللي حصل وقالي الولد ده سايب كلب على زين وعز في الملعب، ومتخافيش يا مدام أنا مسكته أهو بس هو شكله مش من عندنا وأنا سألت الولد وقلتله فين مامتك یا حبیبی وإنتوا ساكنين فين وقالي البيت أهو وشاورلي عليه.
وتابعت: وأنا قلتله إنت إزای ماشي بالكلب ده لوحدك روح نادي لمامتك أنا عايزة أتكلم معاها، وهو طلع مشي على الرصيف وأنا اتحركت وراه بالعربية الخطوتين دول ودخل البيت ولقيت واحدة ست خارجة من البيت ومعاها ناس كتير خارجين معاها، وهي خارجة تشتم فيا بأبشع الألفاظ، قلتلها أنا جايلاك لحد بيتك علشان أقولك متخرجيش ابنك بكلب وعلشان تعتذري عن اللي ابنك عمله فتعملي كده، وجوزها كان واقف معاها وكان بيهديها وبعد كده قالی متستفزيهاش علشان إنتي مش قدنا.
