أعطوه كورتيزون ومسكنات 3 أيام دون أشعة لتشخيص الألم.. أسرة تتهم مستشفى الأطفال التخصصي في العجوزة بالإهمال
اتهمت أسرة الصغير يدعى آدم العاملين بمستشفى العجوزة التخصصي بالإهمال والتقاعس في تشخيص مرض الصغير ما أسفر عن تدهور حالته الصحية وتحدثت الأسرة قائلة: فضلوا 3 أيام يدوله كورتيزون ومسكنات من غير عمل أشعة توضح سبب الألم.
أسرة تتهم مستشفى الأطفال التخصصي في العجوزة بالإهمال
وقال والد الصغير إن نجله آدم في بداية مرضه كان يعاني من ألم شديد في بطنه، وقيء مزمن وسخونية، وتم تشخيصه بحمى البحر المتوسط واتحول لمستشفى الأطفال التخصصي بناءً على طلب الدكتورة اللي شخصت حالته، وفضلوا 3 أيام كاملين يدوله كورتيزون ومسكنات كل 3 ساعات، من غير ما يتم عمل سونار أو أشعة توضح سبب الألم الحقيقي.
وأكمل: من أول يوم وإحنا بنطالب بعمل سونار ورنين له لمعرفة سبب الألم، وكل الردود كانت: بكره هنعمل، مشيرًا إلى أن آدم كان بيصرخ صريخ يوجع القلب، صوته جايب المستشفى كلها، وبيترمي على الأرض من شدة الألم، وكل الحلول الي كانو بيعملوها كان مسكن جديد.
وأضاف: طلبنا تدخل دكتور الجراحة، واتشاف من أكتر من دكتور، وقالو مش زايدة، وفي اليوم التالت، بعد ما الحالة ساءت جدًا، جت دكتوره تبلغنا إن أطباء الأطفال مش قادرين يشخصوا الحالة ومستنيين دكتور الجراحة ييجي، واستنينا من 8 الصبح لـ 11 ومحدش جه.
وأكمل: قررنا نمشي بآدم رغم رفضهم خروجه، وكتبوا في التقرير إن حالته خطرة وإننا خارجين على مسؤوليتنا، عشان يبعدوا نفسهم عن أي مسؤولية، وأول ما دكتور تاني شاف أوراقه حوله عمليات فورًا، وبعد الجراحة قال لنا: إحنا لحقناه في آخر لحظة.
واختتم: اللي اتلاقى في بطن ابني الزايدة كانت منفجرة بقالها أيام، ونص لتر صديد عايم وسط الأمعاء، وبراز داخل تجويف البطن، والصديد واصل للكبد والبنكرياس، والتصاقات في الأمعاء، وتسمم في الدم، و3 أيام تأخير كانوا كفاية يضيعوا حياته، وآدم دلوقتي محجوز بيعاني من ألم شديد والتهابات وخمول في الأمعاء، رافض الأكل ومش قادر يتحرك.
