حسابك مفتوح يا حاج.. الأمن يفحص سرقة 210 آلاف جنيه مكافأة نهاية الخدمة من مسن ببولاق الدكرور
تفحص الأجهزة الأمنية تداول واقعة تعرض مسن "على المعاش" لواقعة مغافلته من قبل سيدتين وسرقة مبلغ مالي 210 ألف جنيه "مكافأة نهاية الخدمة"، وذلك بمنطقة بولاق الدكرور.
الأمن يفحص واقعة مغافلة مسن وسرقة 210 ألف جنيه أمام ماكينة صرف آلي
وتعود تفاصيل الواقعة حينما تداول مستخدمو مواقع التواصل الاجتماعي منشورًا حول تعرض مسن لواقعة سرقة مكافأة نهاية الخدمة، وزعم ناشر الواقعة، قائلًا: واحده ست وبنتها بيستغلوا الناس الكبيرة في السن، حمايا كان بيقبض المعاش من مكنة ATM في منطقة الكوبري الخشب بولاق الدكرور.
وزعم: لقي ست كبيرة بتنده عليه بتقول له يا حج حسابك لسه مفتوح، هو عشان راجل كبير ومالوش في التكنولوجيا، ومريض قلب وسكر وكان صايم وتعبان أصلًا، رجع المكنة تاني، وكانت بنت الست اللي ندهت عليه واقفة على المكنة، قالت له يعمل خطوات من باب إنها بتساعده يقفل الحساب.
وادعى: وهي مكنتش بتساعده ولا حاجة، هي كانت بتحاول تعرف الباسورد بتاع الفيزا؛ لأنه لما رجع طلبت منه يحط الفيزا تاني عشان يقفل الحساب. بعد ما عرفت الباسورد، الست الكبيرة ندهت عليه عشان تلفت انتباهه، والبنت بدلت الفيزا بفيزا معاها، كده بقت الفيزا معاهم والباسورد معاهم. المهم هو روح، الكلام ده كان عَ العصر، صلاة العصر، ونام بعد المغرب، لما مسك التليفون لقي مسحوب من حسابه 210 آلاف؛ لأن الفيزا كان فيها مبلغ مكافأة نهاية الخدمة، تعب وشقى أكثر من 45 سنة.
وأكمل: دلوقتي للعلم الـ 210 ألف، هي اشترت دهب من محل دهب في شارع العشرين بـ 195 ألف، وحسبته على 200 ألف وأداها الباقي، ده كلام بتاع الدهب، وسحبت من ATM مبلغ 5 آلاف جنيه، وفي 5 تانية، وأماكن السحب كانت شارع العشرين فيصل. وإحنا وقفنا الفيزا، بس عرفنا إنها حاولت تسحب تاني بليل من ATM في منطقة بهتيم شبرا.
من جانبها تفحص الأجهزة الأمنية المنشور المتداول للوقوف على كافة الملابسات الخاصة بالواقعة، تمهيدًا لاتخاذ الإجراءات القانونية حيالها.
