أقوال الفتاة في واقعة إجبار شاب على ارتداء ملابس نسائية بالقليوبية: قولتله تعالى نهرب ونبعد عن البيت
يستكمل القاهرة 24 نشر التحقيقات في واقعة إجبار شاب بقرية ميت عاصم التابعة لمركز بنها بمحافظة القليوبية على ارتداء ملابس نسائية في القضية المعروفة إعلاميا بـ بدلة الرقص.
واقعة إجبار شاب بقرية ميت عاصم
وجاءت أقوال صاحبة المجني عليه سابقا، بسؤالها متى بدأت تلك العلاقة تحديدًا ؟
ج: منذ حوالي سنتين تقريبا.
س: وهل قام سالف الذكر بالتقدم لخطبتك؟
ج: لا هو كان علاقتنا أصحاب وكنا بنحب بعض وما مقلناش لبعض بس أنا كنت مخطوبة وما كنتش متفاهمة مع خطيبي فكلمت إسلام واعترفتله بحبي ليه وهو قالي نفس الكلام.
س: وما هي كيفية تقابلك مع المدعو إسلام؟
ج: أنا اللي اتصلت بيه وقولتله تعالى علشان نتقابل علشان عايزه أقولك على حاجة وروحت كافيه في الأهرام وقابلت إسلام هناك.
س: وهل المدعو إسلام هو القائم على طلب التقابل معكي؟
ج: لا أنا اللي قولت له تعالى تقابل عشان أنا عايزاك نتكلم في حاجة.
س: وما هي طبيعة الحوار الذي دار بينكما آنذاك؟
ج: أنا قولتله إن أنا بحبك ومش متفاهمة مع خطيبي بسبب فرق السن وأنا عارفة إن أنت بتحبني ومش هتعرف نعيش من غير بعض تعالى نهرب ونبعد عن البيت ونروح حته تانية.
من: وهل اعترف لك المدعو اسلام بثمة اعتراف؟
ج: أيوه هو قالي أنه بيحبني وقالي أنه مش متفاهم مع خطيبته ووافق على طلبي إننا نروح إسكندرية.
س: وأين تم تقابلك مع سالف الذكر؟
ج: احنا قعدنا في كافيه في الاهرام وبعد كده طلعنا روحنا إسكندرية وقعدنا على البحر وبعد كده اتمشينا شوية.
س: ما الذي حدث عقب ذلك؟
ج: روحنا على فندق عشان نقعد فيه بس هما رفضوا يدخلونا عشان أنا مش معايا البطاقة والفلوس خلصت وروحت بعت التليفون بتاعي.
س:هل أجبرك المدعو إسلام لبيع الهاتف المحمول؟
ج: لا أنا اللي بعته بمزاجي عشان نصرف ونخرج وأنا كنت بصرف طول الرحلة أنا وهو عشان نتبسط.
س: وهل أجبرك سالف الذكر على اصطحابك لذلك المكان؟
ج: لا أنا روحت بمزاجي وكنا متفقين أنا وهو.
س: وما هي المدة التي مكثت فيها مع إسلام؟
ج: احنا قعدنا من يوم الثلاثاء ٢٠٢٦/٢/١٠ لحد يوم الخميس ٢٠٢٦/٢/١٢ ولما رجعنا قعدنا عند ابن اخته.
س: هل من ثمة تعدي جنسي وقع عليكي من المدعو إسلام؟
ج: لا.
س: وهل استطالت يد سالف الذكر ثمة أماكن من جسدك؟
ج: لا هو ملمسنيش ولا عمل حاجة ما كان بيحافظ عليه.
س: وهل قام سالف الذكر بتجريدك من ملابسك؟
ج: لا هو معملش حاجه معايا.
س: وهل قام سالف الذكر بالتجرد من ملابسه؟
ج: لا احنا قعدنا من غير ما نعمل حاجه لأننا كنا على البحر وكنا بنتمشى على البحر.
س: وهل أنتي بكر أم سيب؟
ج: أنا لسه بكر وهو ما عملش معايا حاجة.
