صالح جمعة يوضح كواليس جديدة في أزمته مع إمام عاشور
كشف صالح جمعة كواليس الاستوري التي نشرها إمام عاشور في وقت سابق ردًا عليه، عقب تصريحاته السابقة في فبراير الماضي.
تصريحات صالح جمعة
وقال صالح جمعة في تصريحات تليفزيونية: لم أكذب في أزمة إمام عاشور، وتم إجباره على هذا الاستوري، إمام عاشور مش هو اللي كتب الاستوري اللي نزلت على صفحته.. واللي خلاه يعمل كده حد من جوه النادي الأهلي ومعروف جدا.
وأضاف: إمام عاشور كان مضغوط واتقاله نزل الاستوري ده بالأمر.. فأنا تفهمت الموقف، ولما نزل الاستوري كنت متضايق.. بس لما فهمت الكواليس هديت ولم أتحدث معه حتى الآن.
أزمة صالح جمعة وإمام عاشور
وكان صالح جمعة قال: إمام عاشور عنده مطالب خاصة من النادي، وحاسس إنه مظلوم، وبيشوف نفسه أفضل لاعب في مصر ومتفوق ماديًا عن أي حد حواليه، وبعيدًا عن الفلوس، هو كمان شايف إن طريقة التعامل معاه محتاجة تبقى أحسن من كده، وهو قدامه عروض كويسة بأرقام محترمة، وبيفكر في مستقبله وعايز تعاون من النادي، في الآخر، الكل عايزه يكمل ويبقى موجود، والموضوع ممكن يتحل بشكل هادي ونقعد معاه ونجدد له سنتين، واللي مضايقه فعليًا هو الجانب المادي، وهو العامل الفاصل في كل حاجة.
ونفى إمام عاشور كل أحاديث صالح جمعة، ويقول عبر استوري: أي كلام اتقال في أي برامج على لساني أو منسوب ليا أو نقلا عني لم يحدث من الأساس وأنا غير مسؤول عنه، لم يصدر مني أي حاجة من كل اللي اتقال كله غير صحيح حتى المقابلة نفسها لم تحدث أصلا، مع الاحترام للجميع وكل تركيزي في تدريبي وشغلي وبس ومصلحة فريقي أهم من كل الكلام شكرا ليكم.
صالح جمعة: أوضة لبس الأهلي بايظة
كما أكد صالح جمعة نجم الأهلي ومنتخب مصر السابق، أن أوضة لبس النادي الأهلي هذا الموسم بها العديد من الأزمات بسبب الفوارق المادية، حيث قال في تصريحاته: الأهلي بيقدم مستوى سيئ من أول الموسم، مينفعش يكون خط الهجوم بالإمكانيات دي وهذا المستوى الذي نراه، كل صفقات الأهلي ملهاش أي تأثير، ولا زيزو عمل حاجة ولا حتى إمام عاشور غير فترات ومفيش إضافة.
وأفاد: لازم أسماء تمشي مثل بيكهام وأحمد عيد وطاهر ومحمد شريف؛ لأن أوضة اللبس السنة دي صعبة جوه الأهلي وده لأول مرة يحصل.. وفيه فوارق مادية كبيرة.
وأتم: وسام أبو علي أكتر لاعب ماكنش ينفع يمشي، ومن الوارد أن يتم تعويض رحيل زيزو وتريزيجيه ولكن الأهلي لن يقدر على تعويض إمام عاشور.
