دياب: مصطفى غريب من أهم الممثلين اللي وقفت قدامهم في حياتي.. والغناء دلع بالنسبة للتمثيل
أشاد الفنان دياب بموهبة الفنان مصطفى غريب، وذلك بعد النجاح الذي حققاه في مسلسل هي كيميا، الذي عرض في موسم رمضان الماضي 2026.
وقال دياب في لقائه ببرنامج يحدث في مصر: المسلسل خلاني أعمل شيفت كارير، السنة اللي قبلها عملت شرير ومريض نفسي، ورايح أعمل كوميدي، وفكرة المسؤولية أن أنا ومصطفى واقفت جنب بعض كتف في كتف وهو جاي من نجاح كبير أوي من أشغال شقة.
وأضاف دياب: مصطفى غريب، المسؤولية عنده بقت الضغف لأنه حاجز مكان كبير في قلوب الناس، وأنا كنت حاسس بيه جدًا وهو قلقان هل هيضحك الناس، ولكني كنت بطمنه يوم ما عملنا أكشن قولتله إحنا هنبقى رقم واحد، اليوم ده حسيت بطمأنينة جيالي من عند ربنا، صحيح أني اتخضيت شوية قبل رمضان لما توقعات الناس عليت ده رعبنا أكتر.
وأكمل دياب: مصطفى من أهم المواهب والممثلين اللي وقفت قدامهم في حياتي المهنية، أكتر حد فاجئني في هي كيميا كان مصطفى، آه بيصنع ضحك لأنه كوميديان عظيم، ولكن في المشاهد اللي فيها دراما أنا ببص في عينه وأنا متسلطن جدًا ده ممثل عتويل وعينيه مليانة مشاعر وطاقة، موهبته عظيمة وأنا مبسوط وأنا واقف قدامه.
أما عن ما هو أصعب التمثيل أم الغناء؟، فعلق دياب: التمثيل أصعب من الغناء، الغناء دلع بالنسبة للتمثيل، أصل طالما صوتي حلو وعندي موهبة خلاص.
