إبراهيم حسن: رحنا الزمالك عِندًا في الأهلي.. وحسام: القطبين عندي واحد ومش ببقى عايز أزعّل حد
كشف إبراهيم حسن، مدير منتخب مصر الأول لكرة القدم، كواليس وأسرار الانتقال التاريخي من الأهلي لـ الزمالك خلال حلقة خاصة وحصرية مع الإعلامي سيف زاهر عبر قناة أون سبورت.
تصريحات إبراهيم حسن
وقال إبراهيم حسن في تصريحات عبر قناة أون سبورت: لعبت أول مباراة بقميص الزمالك أمام الأهلي لوحدي لأن حسام حسن كان مصابًا، والمباراة كانت صعبة للغاية.
وأضاف: لما روحنا تركيا قولنا مش هنلعب تاني في مصر لأن مش مستوعبين الموقف إننا مثلًا مش هنلعب لأي فريق في مصر غير الأهلي، ولكن لما لقينا كلام بيتقال علينا وبنتشتم فـ خدناها عِند بقا ورجعنا لمصر على الزمالك، ومتكلمناش في فلوس بل تحدي، احنا كباتن النادي الأهلي على مدار 20 سنة، وخدناها تحدي بقا إننا هنلعب للزمالك عادي.
وأشار إبراهيم حسن في تصريحاته: استنينا حد في النادي الأهلي يكلمنا قبل ما نروح المؤتمر الصحفي لنلعب في الزمالك، ويقولنا ارجعوا في كلامكم وجددوا، ولكن محصلش، فـ ركبنا وروحنا المؤتمر، ولما لبسنا تيشيرت الزمالك كان الموضوع صعب وحاسين إن لا مش احنا يعني.
وأردف: اللي يزعّل لحد دلوقتي إن الناس اللي لسة عايشين دلوقتي وعاشوا الموقف مدوناش حقنا، ومقالوش دا احنا اللي فرطنا فيهم.
وأفاد: كابتن محمود الجوهري عمره ما قالنا نلعب دفاعي أو إننا نخاف، وكنا بنلعب قدام أي منتخب هجومي، واللي كان قلبه ضعيف مكنش بينزل.
وأتم حديثه بالبكاء بعد تصريحاته عن والدته التي فارقت الحياة، حيث قال إبراهيم حسن: أمي رحيلها مأثر فينا احنا الاتنين، وهي اللي كانت شايلة البيت ورحيلها أثّر علينا.. وكنا لازم ننام جمبها واحد على الايد دي وواحد على الايد دي.. ورحيلها لحد دلوقتي مأثر فينا.
تصريحات حسام حسن
في المقابل، قال حسام حسن في تصريحاته مع الإعلامي سيف زاهر: واحنا رايحين أول مرة نمضي في الزمالك، كان في جماهير أهلاوية مكنتش مصدقة، ولا احنا كنا مصدقين، ولكننا كنا متضايقين من اللي حصل معانا في الأهلي، ولكن مع أول مباراة في الزمالك نقطة ومن أول السطر.
وأضاف: بحس إني طول عمري في نادي الزمالك، إنما الأهلي والزمالك الاتنين عندي واحد ولما باجي أتكلم على جمهور الأهلي والزمالك بتحرج ومش ببقا عايز أزعّل حد.
واختتم: أنا وإبراهيم البطولات اللي خدناها مع الزمالك أثبتت إننا بنحب الناس اللي فرحت إننا متواجدين وادينالهم كل اللي عندنا في وقت كنا مضغوطين فيه.
