إبراهيم حسن: محمد صلاح عارف إن حسام حسن عايزله الخير.. ومش شايفين ميسي ولا غيره
تحدث إبراهيم حسن مدير منتخب مصر الأول لكرة القدم، عن بعض الأمور الخاصة بالفراعنة، عقب الفوز على أستراليا والتأهل لمواجهة الأرجنتين بقيادة ليونيل ميسي في ثمن نهائي كأس العالم 2026.
تصريحات إبراهيم حسن
وقال إبراهيم حسن في تصريحات تليفزيونية: الحمد لله مبسوطين إننا كنا سبب في جعل الشعب المصري مبسوط وهنعمل أقصى حاجة ربنا يقدرنا عليها، وشرف لنا تهنئة الرئيس لنا وهذا شيء معنوي لنا، إنه فاكرنا في أفضل اللحظات، وعايزين نبقا سند لـ مصر في الرياضة، وإن شاء الله نبقا عند حُسن ظنه وهنقاتل ضد الأرجنتين للوصول إلى الدور ربع النهائي.
وأضاف: اللي عملناه دا أقل حاجة نقدمها لـ مصر والشعب المصري الجميل وسيادة الرئيس.. ونعدهم أننا سنقاتل لآخر لحظة عشان نعمل أفضل شيء لبلدنا.
وأشار إبراهيم حسن في تصريحاته: اللاعيبة لسه معملوش حاجة ولسه مطلوب منهم كتير وكلنا على قلب واحد إننا نفرّح الشعب المصري واحنا هنا في أمريكا بنرفع علم مصر، اللي يستحق إننا نضحي عشانه ومصر هي تاريخ العالم والدنيا كلها، وشرف لينا إننا نرفع علم مصر، وقادرين على تحقيق إنجاز يدخل الفرحة على قلوب المصريين.
وعن الدقة في تنفيذ ركلات الترجيح، كشف إبراهيم حسن عن السبب قائلًا: بنتمرن في العادي على ركلات الترجيح، ودا تدريب مستمر وأساسي يوميًا في عملنا، والتدريب على ركلات الترجيح يوميًا حتى لو هنلعب مباراة في دور المجموعات، واللاعيبة بقت بتحفظ والموضوع بقا سهل، عشان لما نوصل لدور إقصائي الرهبة متبقاش موجودة، ورغم ذلك بنقاتل عشان منوصلش ركلات الترجيح.
وعن الإصابات أفاد: هناك بعض اللاعبين تعرضوا لإجهاد، وأحمد فتوح ومحمد عبد المنعم من الصعب أن يلحقا بمباراة الأرجنتين، والوقت ضيق للغاية واللاعبين مجهدين بسبب ذلك.
وتطرق للحديث عن محمد صلاح، حيث تابع إبراهيم حسن تصريحاته قائلًا: محمد صلاح بيلاقي نفسه مع منتخب مصر وحسام حسن، وصلاح في تطور رهيب ويثق في حسام حسن وعارف إنه عايزله الخير وكل حاجة حلوة والمصلحة واحدة، وشخصية مختلفة نهائيًا واحترافي، وبشكر الجهاز الطبي والفني وكل فرد في منتخب مصر، وإصابة صلاح كانت بسيطة تحتاج لـ10 أيام ومع ذلك كنت قلقان لحسن ميلعبش.
وأردف: حسام حسن مهيأ لكل اللاعبين كل شيء، وفي المحاضرات بيدرس المنافس جيدًا وبيحفّظ كل لاعب بالحرف وبالطريقة المناسبة وكل ماتش يناسبه تكتيك معين، وندرس كل منتخب ونهيئ لكل الظروف للاعبين من أجل النجاح، واللاعيبة لما بتنزل بتبقا قارية الماتش، وفيه سهولة وكل لاعب عارف شغله اي، وحسام بيقولهم من أول يوم انت بتلعب كأس عالم ومش عاوزين نروّح وبنمشي بشنطة خفيفة مش بنجمّع حاجتنا عشان عارفين احنا عايزين اي، عشان كده كل لاعب بينزل قلبه جامد، وبنقولهم متخافوش من حد، انت بتلعب بـ اسم مصر، هل انت ضامن تعيش لحد ما تعمل تاريخ تاني؟!.
واستمر قائلًا: هيثم حسن لاعب مميز جدًا وكنا منتظرين الوقت المناسب لمشاركته، وكل اللاعبين أساسيين محدش ضامن مكانه، حتى حراس المرمى.
وأتم: منتخب مصر قادر على مواجهة أي منتخب في كأس العالم، ومش شايفين ميسي ولا غيره احنا شايفين نفسنا بس، وبنقول لـ اللاعيبة متشوفش مين اللي قدامك لأنك لو بصيت دا مين مش هتقدر يبقا قلبك ميت، العب ودوس، احنا عندنا محمد صلاح و26 لاعب ميسي، ومع احترامي لـ ميسي احنا مش مركزين عليه بس ومش عايزين اللاعيبة تشوف حد.
