مصطفى كامل عن الفيديو المسيء لأهل الشرقية: تم تحريف كلامي.. لغاية إمتى هتشككوا في المخلصين!

رد الفنان مصطفى كامل، نقيب المهن الموسيقية على الفيديو المنتشر له، والذي تضمن الإساءة لأبناء الشرقية، وتعرض بسببه للهجوم وتقديم عدة بلاغات ضده  خلال الساعات الأخيرة الماضية، مؤكدًا أنه مفبرك وتم تحريف حديثه.

وقال مصطفى، خلال فيديو نشره عبر حسابه على فيسبوك، الآتي: أنا عملت الفيديو ده عشان أقول إن أهل الشرقية دول إخواتي وحبايبي، وما يصحش أبدًا إن الموضوع يتاخد بشكل عام، يعني أنا في النهاية كان تحقيق مع عضو مجلس إدارة يخص فرعًا، وتم تحريفه داخل الفيديو، واللي ظهر لحضراتكم يبين قد إيه إن فيه تلاعب وفيه نية.. واحد قاعد كان بياكل من خير النقابة دي أو بيقبض مرتب منها، لأن اللي عامل كده ده مش عضو مجلس، ده واحد كان بيقبض مرتبًا منها، إنه يقعد أربع سنين كان بيصور الناس من ورا لورا ويبعتلي أنا، كان بيبعتلي أنا حاجات هو مصورها خلسة.

[[system-code:ad]]

وأضاف: أربع سنين وتنزل دلوقتي عشان يتقال مصطفى كامل مش عارف بيقول إيه للشرقية.. إطلاقًا أنا بحب كل الدنيا، أنا راجل محب لولاد بلدي كلهم بكل طوائفهم، بكل انتماءاتهم، بكل دياناتهم، أنا راجل محب للمسلم والمسيحي، أنا راجل راعيت ربنا في كل عضو عندي، راعيت ربنا في الابن اليتيم لأي عضو توفى عندي، راعيت ربنا في زميلي عضو المعاش، راعيت ربنا في الأرملة التي تعول أي يتيم، مش هيتبقى لي غير إني أقول: حسبي الله ونعم الوكيل، وأنا بحب كل أقاليم مصر وكل محافظات مصر، ومعروف عني إن أنا مش ممثل في الحاجات دي، أنا راجل بتكلم من قلبي، لا عمري غلطت في محافظة، ولا ينفع أغلط في محافظة، ولا في أهل محافظة، لأن أنا مش بتاع الكلام ده، ما فيش محافظة من المحافظات، خصوصًا الأقاليم دي، إلا ولما حبايبي في أفراحي، في حفلاتي، بشوف السعادة في عينيهم وبكون سعيد معاهم.. بحبكم جدًا وبحب بلدي جدًا، ومخلص للمسؤولية المعلقة في رقبتي أمام الله وأمام دولتي.. هفضل بقول إن أنا حاسس إن الكرسي ده مش كرسي أنا قاعد عليه عشان خاطر الموسيقى، لأ، أنا قاعد عليه عشان خاطر بلدي وطني.

وأردف مصطفى كامل: حربي ضد الفاسدين الذين أفسدوا، سواء قبلي أو في وجودي، وكل من وجدته لا يراعي الله، ومش مراعي ضميره، ومش مراعي ربنا في الأمانة اللي مؤتمن عليها، قاتلت عشان أوصل بهذا الكيان لما وصل إليه، الحمد لله، من تَباهٍ أنا بفخر بيه قدام نفسي وقدام ربنا وقدام زملائي أعضاء الجمعية العمومية، قدري إن أنا مش حرامي، وإن أنا مش بتستر على فساد، فكلما حاربت الفساد، كلما وجدت شلة صغيرة، على فكرة، هما مش كتير يا جماعة عشان برضو أكون دغري، هي شلة بسيطة وشلة صغيرة، بس كانت مستحلة مال اليتيم والحي والمريض. أيام ما كان فيه فساد معلن وفساد كبير جدًا، ما كانش فيه حد بيتكلم للأسف، وللأسف ماليش في الغش والتدليس، وماليش في النفاق، وماليش في التستر على الفساد، بدفع تمنه إن دلوقتي صفحات وهمية بتتعمل وفيديوهات مفبركة، وأخيرًا، الأيام اللي فاتت دي، لقينا فيديو معمول لمندوب كان مشي من النقابة بيسب فيه أستاذ دكتور عندي، عضو مجلس إدارة، وبيشتمه، وبيتهمه بأفظع الاتهامات، لما كلمناه أنا والدكتور والناس، قالوا إن فيه فلان الفلاني، وإنت يا فلان والله ما هنسيبك خلاص. إحنا قررنا إن كل من هو إحنا نعلمه هيتبلغ بيه للجهات الأمنية، والجهات الأمنية لابد إن هي تحمينا كمان، لأن إحنا قاعدين بندير مؤسسة خدمية، ناديت فيها أكتر من مرة، وقلت فيها أكتر من مرة لكل جهات الدولة اللي بحترمها وبقدرها، قلت: دي كانت منهوبة، دي كانت منهبة، لغاية إمتى هتفضل الناس اللي أخلصت بيشكك فيها وبيصطنع لها الفتنة.

كما أكد مصطفى كامل على اتخاذه الإجراءات القانونية اللازمة، قائلًا: الحملة أو الصفحات الوهمية والكلام ده خلاص، مجراها إحنا اتخذنا إجراءاتنا القانونية معاها، وأنا كمصطفى كامل ابن هذه الدولة التي أقدر المسؤولية فيها وإدارة المسؤولية فيها، بناشد كافة الأجهزة، أرجوكم قفوا جنبنا لتحريك سرعة البلاغات المقدمة منا، والتي قدمت منا، والتي ما زالت تقدم منا، لأن اللي حصل ده لا يمكن، يعني أنا بقيت حاسس زي بالظبط كده، إنت عمال بتبني وناس عمالة عايزة تكسر فيك، طب ده يرضي مين؟ ده يرضي مين إن كل شوية نلاقي مكالمة متفبركة لعضو مجلس عندنا، مكالمة ليا متفبركة، جلسة لواحد خسيس قاعد من أربع سنين، سنة 2022.