شقيق القبطان المصري المحتجز على ناقلة نفط بمضيق هرمز: والداي حالتهما صعبة.. والشركة مش بتبعت مرتبه | خاص
بعد مرور نحو 7 أشهر على احتجازه داخل ناقلة نفط في مضيق هرمز بإيران، لا تزال معاناة عماد سلطان القبطان المصري وأسرته مستمرة، وسط مطالبات بتدخل عاجل من الجهات المعنية لإنهاء الأزمة.
شقيق القبطان المصري المحتجز على ناقلة نفط بمضيق هرمز: والداي حالتهما صعبة
كشف شقيق القبطان عن تدهور الحالة النفسية للمحتجزين، مؤكدًا أن الأسرة تعيش ظروفًا نفسية ومادية بالغة الصعوبة منذ بداية الواقعة.
قال شقيق عماد سلطان القبطان المصري المحتجز على ناقلة نفط في مضيق هرمز بإيران في تصريحات خاصة لـ القاهرة 24: آخر مرة تواصلنا معاه كانت يوم الجمعة اللي فاتت، ونفسيته تعبانة جدًا هو والضابط المصري اللي معاه، الاتنين حالتهم النفسية سيئة جدًا، والضابط التاني كذا مرة كان هيجراله حاجة من كتر الضغط، لأنهم محبوسين على السفينة بقالهم شهور.
وأضاف: إحنا بنحاول نهون عليهم ونطمنهم، لكن للأسف مش عارفين نتواصل مع أي حد أو نوصل لأي جديد في القضية.
وأوضح: بقاله 7 شهور محتجز، وإحنا عايشين في هم وحزن. أولاده لسه صغيرين، وبنته كانت لسه متجوزة قبل ما يسافر على طول ودلوقتي خلفت وهو مش معاها.
وأضاف: تعبنا نفسيًا جدًا بسبب غيابه، ووالدي ووالدتي حالتهم صعبة جدًا. بيحاولوا يداروا حزنهم، لكن الموضوع صعب عليهم.
وأشار إلى أن الأزمة أصبحت تؤثر أيضًا على أوضاع الأسرة المعيشية، قائلًا: "الشركة بقت ما بتبعتش مرتبه، ومبقاش فيه دخل تقريبًا، فالوضع بقى صعب جدًا."
واختتم مناشدته قائلًا: أتمنى أي حد من الجهات المسؤولة يتدخل، سواء وزارة النقل أو البحرية أو أي جهة تقدر تساعد، وربنا يرجعهم سالمين، هو وكل المصريين المحتجزين خارج بلدهم.
