مصورة فيديو واقعة دهس هدير بائعة الشاي: مروان قال إنه كان بيعلم جودي السواقة |خاص
كشفت التحقيقات في القضية رقم 1514 جنح طفل الأهرام لسنة 2026، والخاصة بوفاة هدير محمد بائعة الشاي، بعدما صدمتها سيارة، ما تسبب في إصابتها بإصابات بالغة أودت بحياتها، أقوال المتهمين.
واقعة دهس هدير بائعة الشاي
وحصل القاهرة 24، على نص التحقيقات، وجاءت أقوال مصورة فيديو حادث واقعة هدير بائعة الشاي أمام جهات التحقيق، بسؤالها ما معلوماتك بشأن الواقعة محل التحقيق؟
ج: اللي حصل إني كنت في المحل اللي بشتغل فيه، سمعت صوت خبطة جامدة وصويت ناس، فخرجت أجري، لقيت في حادثة كبيرة في الجانب التاني، فأنا جريت خفت ليكون حد من ولادنا في الحادثة، فلقيت البنت المتوفية الله يرحمها على الأرض، والبنت التانية المصابة اللي اسمها كنزي بتقول "الحقونا، البنت كانت هي اللي سايقة وعايزين يهربوها، الحقونا، روحت أنا مطلعة التليفون بتاعي وصورت الفيديو اللي اتصور ده بناءً على إن كنزي هي اللي قالت إن هي كانت سايقة وإن الولد عايز يهربها، بس أنا مشفتش الحادثة من الأول، ولما رجعت المحل، جت كنزي ورايا وخدت مني الفيديوهات اللي صورتها على أساس إنها هتاخدها على النيابة، بس هي شيرتها على الفيس بوك، وهو ده كل اللي حصل.
س: متى وأين حدث ذلك؟
ج: الكلام ده حصل أول الخميس ٢٠٢٦/٦/١٨ الساعة ٤:٢٠ مساءً، في شارع الجيش قدام جامع العوضي، حدائق الأهرام - الهرم - الجيزة.
س: من كان برفقتك آنذاك؟
ج: أنا كان معايا ناس كتير.
س: ما سبب ومناسبة تواجدك بالزمان والمكان سالفي الذكر؟
ج: الحادثة كانت قدام المحل اللي بشتغل فيه.
س: ما هي صلتك وعلاقتك بأطراف الواقعة؟
ج: أنا معرفش المتهمين، بس البنت اللي ماتت كانت بتشتغل على عربية شاي قدام المحل اللي بشتغل فيه، في الجانب التاني من الطريق.
س: من القائم بتصوير مقطع الفيديو المنتشر على موقع التواصل الاجتماعي؟
ج: أنا اللي مصوراه، وأنا اللي بتكلم في الفيديو، بس اللي رفعه على الفيس بوك المجني عليها التانية، البنت اللي اسمها كنزي.
س: وهل حال قيامك بتصويرك للفيديو الخاص بالواقعة قمتي بتوجيه الكاميرا ناحية المتهمين، وحال توجيهك الكاميرا للبنت قولتي إن الفتاة هي قائدة السيارة، وهي من قامت بالاصطدام بالمجني عليهما، فهل أبدت أي اعتراض على توجيهك الاتهام إليها؟
ج: لا، هي معترضتش على كلامي، وكانت عمالة تبتسم وعملت حركات بإيدها، وكمان طلعت لسانها، وكانت بتستفز كل اللي واقفين حواليها وأنا واقفة بصور، سمعت الولد اللي اسمه مروان بيقول للبنت اللي اسمها حبيبة صاحبتهم إنه كان بيعلم جودي السواقة.
س: وكيف تحصلت المجني عليها على مقطع الفيديو من هاتفك؟
ج: هي جاتلي المحل وخدته مني عن طريق البلوتوث.
س: وهل توجد ثمة خلافات بينك وبين المجني عليها أو المتهم؟
ج: لا.
