علي محمود: لم أنظر لأي عروض أخرى.. وهدفي الوحيد كان العودة إلى الأهلي
أكد علي محمود، لاعب النادي الأهلي الجديد، أن العودة إلى القلعة الحمراء تمثل تحقيقًا لحلم طفولته، مشيرًا إلى أنه رفض التفكير في أي عروض أخرى بمجرد علمه باهتمام الأهلي بالتعاقد معه.
علي محمود: لم أنظر لأي عروض أخرى
وقال علي محمود في تصريحات بالموقع الرسمي للنادي: "حلم كبير بالنسبة لي إن أكون موجود في النادي الأهلي وأرجع بيتي تاني، بصراحة كنت مش مصدق إن الحلم ده بيتحقق".
وأضاف لاعب إنبي السابق: "أنا مش غريب عن الأهلي، لعبت في النادي 6 سنين وأنا صغير، ومشيت في 2015، والحمد لله ربنا كرمني ورجعت تاني".
وتابع: "لما مشيت وأنا صغير اتضايقت زي أي طفل، لكن أهلي كانوا دايمًا في ضهري، وكانوا بيقولولي اجتهد واشتغل وهترجع الأهلي تاني، وده اللي حصل".
وأردف: "لما الدكتور عصام كلمني وقالي الأهلي عايزك، ما صدقتش من الفرحة، وكان بالنسبة لي حلم كبير إني أرجع تاني".
واستكمل: "كان فيه عروض تانية، لكن أنا ما بصيتش لأي حاجة، ولا فكرت في أي عروض أو ماديات، كل اللي كنت بفكر فيه إني أرجع النادي الأهلي".
وأكد: "النادي الأهلي ما بيقبلش غير إنه ياخد كل حاجة ويكسب كل البطولات، وده هدفنا الموسم الجاي".
وأردف: "المنافسة مع النجوم الكبار داخل الفريق هتفيدني جدًا، وهتعلم منهم كتير، وإن شاء الله نساعد بعض ونكمل بعض".
وواصل: "اللعب للأهلي مسؤولية كبيرة، ولازم تبقى مركز طول الوقت وتجيب آخرك، وإن شاء الله أكون قد المسؤولية".
واختتم: "جمهور الأهلي رقم واحد، ومستنيين دعمهم دايمًا، وإن شاء الله بوجودهم معانا نقدر نحقق كل البطولات ونكون دايمًا في المركز الأول".
