حمدي فتحي: نهائي القرن أغلى بطولاتي.. والزمالك اعتقد أن الفوز سيكون سهلًا
تحدث حمدي فتحي، لاعب نادي الوكرة القطري، عن أبرز محطاته مع النادي الأهلي، مستعيدًا ذكريات التتويج بلقب دوري أبطال إفريقيا 2020 في "نهائي القرن"، مؤكدًا أنه الإنجاز الأغلى في مسيرته بقميص القلعة الحمراء.
تصريحات حمدي فتحي
وقال حمدي فتحي: لازم أبقى على قدر الثقة، وجماهير الأهلي كانت خلفي دائمًا طوال فترتي في الأحمر، وهي الأربع مواسم ونصف.
وأضاف: توّجت بـ14 لقبًا مع الأهلي، وأغلاهم هو نهائي القرن.
وكشف لاعب الأهلي السابق كواليس مشاركته في المباراة، قائلًا: كنت لسه راجع من إصابة، وكان ديانج والسولية هما اللي بيلعبوا، وأنا مكنتش هلعب المباراة دي، لكن ديانج جاله كورونا، وعشان كده أنا لعبت، وعمري ما هنسى المباراة دي، وأنا فاكر كل تفاصيلها.
وأضاف: الزمالكاوية كانوا متوقعين إنهم هيكسبوا بسهولة، ودخلنا المعسكر المغلق قبل المباراة بأربعة أيام، والمباراة كانت على حياتنا، والحمد لله كان التوفيق معانا، رغم إننا لم نكن الأفضل، وعملنا كل حاجة صح وربنا كرمنا في النهاية.
وأشاد حمدي فتحي بقوة الزمالك في تلك الفترة، مؤكدًا: الزمالك كان فيه لاعبين كبار، طارق حامد، وفرجاني ساسي، وزيزو، وشيكابالا، وكانوا جيدين جدًا، وهو أفضل جيل جه الزمالك تقريبًا.
وتابع: هدف شيكابالا في نهائي القرن إحنا كنا بنتمرن عليه، وإحرازه الهدف في المباراة كان بمثابة الصدمة.
وواصل: كلنا قلقنا لما حسين الشحات ضيع الكرة في العارضة، لكن حافظنا على هدوئنا حتى هدف أفشة.
واختتم حمدي فتحي تصريحاته برسالة تحفيزية، قائلًا: لازم تشتغل وتتعب وتضحي وتحرم نفسك عشان توصل، ولو معملتش كده مش هتوصل لحلمك ولا لهدفك، لأن مفيش حاجة هتجيلك وإنت قاعد.
