محمد رياض: كسرنا النمط المركزي في المهرجان القومي للمسرح.. ورفضت المساعدات الخارجية
كشف الفنان محمد رياض رئيس المهرجان القومي للمسرح تفاصيل وكواليس تحضيره للدورة التاسعة عشر، المقرر إقامته في الفترة من 25 يوليو إلى 11 أغسطس المقبل.
تحديات الدورة 19 من المهرجان القومي للمسرح
وقال رياض خلال لقائه مع القاهرة 24: المجهود كان مضاعف، كان فيه تحضير من بدري جدًا، إحنا بقالنا 6 شهور بنشتغل، من قبل رمضان، كان فيه تحدي آخر لنا السنة دي هو عمل عرض تطبيقي للورش الفنية كلها، مع استخدامنا لنص من النصوص الفائزة، وعملنا عروض قراءة مسرحية كانت عظيمة، عملنا تلت عروض لنصوص فائزة برضه في المهرجان القومي للمسرح، دا كان تحدي كبير جدًا إنك تعملي عرض مش مسألة سهلة، وبالولاد كمان.
وأردف: كان عندنا تحدي إن إحنا نأكد على خروج المهرجان في المحافظات، ودا كان شيء مهم أوي كسرنا فيه المركزية وخرجنا للأطراف واشتغلنا على العدالة الثقافية، يعني كان فيه مقولة زمان وكنا بنسمعها إن الناس في المحافظات والأرياف يقولك "إحنا رايحين مصر"، وكأن القاهرة هي مصر بالنسبالهم، فكانوا محرومين إلى حد كبير من المنتج الثقافي اللي بيُقدم في مصر، فإحنا نقلنا المنتج الثقافي للمحافظات، ودي كانت خطوة مهمة جدًا، ودي خطوة وزارة الثقافة بتنتهجها، والمهرجان القومي للمسرح من أهم المنصات الثقافية في الوزارة للتأكيد على فكرة العدالة الثقافية.
أما عن إمكانية خروج فعاليات المهرجان القومي للمسرح لخارج الإطار المصري وأن يجول في دول آخر، أردف محمد رياض: ديه آليات أخرى، وقوانين أخرى، وفلوس أخرى، وحاجات كتير، لكن ممكن آه يتطور في إنه يستضيف عروض عربية، واتعرض عليا الكلام دا بس أنا لا أقبل على المهرجان القومي للمسرح لأنه مهرجان الدولة، فأنا حاطه في الإطار بتاع الدولة، الفريم الكبير جدًا جدًا، لما الدولة تقدر تستضيف عروضها من بره أو شخصيات هعمل كدا، لكن مقدرش أنا.. المهرجان القومي دا مسمحتش أبدًا إنه أي حد يساعده من بره، رفضت، مهرجان كبير دا مهرجان دولة لازم أحافظ عليه.
ميزانية المهرجان القومي للمسرح
وأشار محمد رياض إلى أنه حرص على ترشيد ميزانية المهرجان في الدورة 19، قائلًا: الميزانية مزادتش، وكان نفس أزودها نظرًا لارتفاع الأسعار، لكن جالي جواب بترشيد الميزانية، وخلوني اقولك إن فيه ناس فهمت الترشيد غلط، وإن الترشيد يعني إلغاء، ولكن الترشيد يعني إزاي أحسن التصرف في المزيانية، بالعكس، السنة دي عملت فعاليات أكتر بكتير، وأنشطة أكتر بكتير، واشتغلت وقت أطول بكتير.
آليات اختيار المكرمين
وتطرق رياض في حديثه عن اختيار المكرمين في الدورة 19 من المهرجان، مضيفًا: إحنا عندنا معايير، معندناش حاجة على المزاج، يعني مش كل واحد عنده حد بيحبه فيطرحه، لأ دا فيه معايير لازم يبقى عنده تجربة مسرحية ممتدة ومؤثرة، وبنراعي حاجات؛ زي إن التكريم يبقى بيشمل كل تخصصات المسرح، وكمان وجود النسبة ما بين السيدات والرجال، وفيه كمان معيار السن، وكمان بنكرم على الإبداع وليس الإدارة.
وأكد الفنان محمد رياض على أنه حرص على تقدير الفنانين الراحلين، قائلًا: التكريم اللي على المسرح دا للأحياء فقط، السنة دي عاملين ندوة بنتكلم عن أعمال الفنانين الراحلين، وتأثيرهم وإيه العلامات المضيئة في حياتهم الفنية، منهم الفنان أشرف عبد الغفور وياسر صادق وعبد الرحمن أبو زهرة، والموسيقار محمد عزت، وعبد العزيز مخيون.
