أنتوا مش شايفني؟.. سامو زين: اتاخد مني 20 أغنية وكل ما أشتغل على حاجة ألاقيها مع مطرب تاني
كشف الفنان سامو زين، تفاصيل حصول عدد من المطربين بالوسط الفني على أغانيه بعد عمله على الكلمات والألحان، موضحًا أنه أصبح يسجل الأغنية قانونيًا أولًا ومن ثم يبدأ العمل عليها.
وقال سامو زين، في لقاؤه مع القاهرة 24: اتاخد مني 20 أغنية، وأجي أنزل أغنية ألاقيها خالصة تنازل، الدنيا اتغيرت أوي، وبقيت مغلق أكتر على نفسي وبقيت بخاف على اللي بقدمه لأني بقيت بعمل حاجة وألاقيها مع حد تاني، وبشتغل على الأغنية واللحن وأغير جمل وأفكار وبعدين ألاقيها مع حد تاني ويقولوا معلش أصل حصل كذا، فأنا أقول مش نصيبي.
وأضاف: أنا عديت كل الفنانين ووصلت لمرحلة أني أقول أنتوا مش شايفني لازم مبقاش ساكت يعني؟ كل فنان ليه احترام والصناع بيكون ليهم فكر ومصلحتهم ولكن متخلنيش أشتغل فيها وبعدين ألاقي الأغنية مش بتاعتي، ودلوقتي بقيت أقول آخد الأغنية وأسجلها وبعدين اشتغل فيها، بسمع الأغنية أقول ياه زي ما كنت عاملها بالظبط، وربنا يوفقهم.
سامو زين: مفيش حد نمبر وان ولا أعلى استماع.. سيب الجمهور يصدرك
ومن ناحية أخرى، سبق وعلق الفنان سامو زين، على جدل الأعلى استماعًا وتصدر التريند، موضحًا أنه لا يرى أن الأمر حقيقيًا خاصة وأن الجمهور هو من يحكم من الأعلى استماعًا على حد قوله، قائلًا: مفيش حد نمبر وان دلوقتي ولا الأعلى استماعًا أنت أعمل أغنية حلوة وسيب الجمهور اللي يصدرك، أسهل حاجة تعمل أرقام، ولكن صعب تستمر في وتبقى في قلوب الناس لأنك مابنتش مع الناس من البداية.
