قلة الحيلة بتاكل في جسمي أكتر من الكيماوي.. شاب ينعى والدته بكلمات مؤثرة: كنت مسافر وملحقتش أحضنك
تصدر منشور شاب يُدعى عمر حسن، ترند موقع التواصل الاجتماعي فيسبوك، خلال الساعات الماضية، بعد أن نعى والدته بكلمات مؤثرة عبّر خلالها عن حزنه الشديد لفقدانها، وتفاصيل مؤلمة عاشها عقب وفاتها.
شاب ينعي والدته بكلمات مؤثرة ويتصدر صفحات فيسبوك
وكتب الشاب في نعيه لوالدته: «ماما.. حضرتك خذلتيني.. خذلتيني علشان عارفة إني كنت راجع من السفر بكرة، واخترتي النهاردة تمشي من غير ما أبوسك وأحضنك آخر مرة».
وأضاف: «خذلتيني علشان يوم العزاء وأنا نازل ساعتي ضاعت في البيت ومش لاقيها لحد دلوقتي، وإنتي مش هنا علشان تلاقيها، لأن محدش هيلاقيها غيرك».
وتابع: «خذلتيني عشان سايبة لبابا طقم العزاء بتاعه مغسول ومكوي في الدولاب في آخر أيام مرضك.. خذلتيني علشان مش عارف لما أوصل أي مكان هكلم مين أطمنه إني وصلت».
واستكمل الشاب نعيه، معبرًا عن مكانة والدته في حياته وحياة أسرتها: «خذلتيني لأنك كنتي الكمال ليا ولاخواتي وبابا وكل اللي حواليكي، ودلوقتي إحساسي بالنقص وقلة الحيلة بياكل في جسمي أكتر من أكل الكيماوي».
واختتم رسالته لوالدته بالدعاء لها، قائلًا: «ربنا يرحمك ويهون علينا الدنيا من بعدك يا حبيبتي.. بحبك».
وتفاعل آلاف من رواد مواقع التواصل الاجتماعي مع كلمات الشاب، معبرين عن تعاطفهم مع حزنه، ومقدمين له ولأسرته رسائل المواساة والدعاء لوالدته بالرحمة والمغفرة.
