معتمد جمال يدافع عن لاعبي الزمالك: مفيش حد وزنه زايد.. ومش معنى ماتشين وحش إن اللاعب وحش
أكد معتمد جمال، المدير الفني لفريق الزمالك، أن جميع مباريات الدوري صعبة، مشيرًا إلى أن حالة اللاعبين والتوفيق من الله هما العاملان الفاصلان في حسم نتائج المباريات.
معتمد جمال يدافع عن لاعبي الزمالك: مفيش حد وزنه زايد.. ومش معنى ماتشين وحش إن اللاعب وحش
وقال معتمد جمال في تصريحات عقب الفوز على البنك الأهلي: زي ما بقول كل ماتش، الماتشات كلها صعبة والظروف صعبة، واللي بيختلف في النهاية هو حالة اللعيبة وتوفيق ربنا.
وأضاف: الماتش اللي فات بدأنا كويس وفنشنا وحش، المرة دي العكس، يمكن ما بدأناش كويس، لكن قدرنا في الشوط الثاني نحسن من نفسنا لحد ما دخلنا في المباراة بعد التبديلات.
وتابع: الحمد لله اللعيبة حافظت كويس وقدمت 45 دقيقة في الشوط الثاني كويسة جدًا، ومن أفضل الأشواط اللي لعبناها، والحاجة الكويسة إن الماتش ده فنشنا وإحنا واقفين على رجلينا، وإن شاء الله الماتشات الجاية يبقى الأداء في الشوطين زي بعض.
وأوضح المدير الفني للزمالك أن الجهاز الفني يضع سيناريوهات قبل كل مباراة، قائلًا: قبل كل ماتش بنبقى متفقين على خطوط عريضة لسيناريو المباراة والتغييرات، وفي الآخر هي توفيق من ربنا، وده اللي حصل النهارده سواء شيكو بانزا أو حسام أشرف أو إيشو.
ورد معتمد جمال على الانتقادات الموجهة للتغييرات، قائلًا: الماتش اللي فات كان فيه بعض اللعيبة نزلت وما سجلتش، ومش معنى كده إن التغييرات كانت وحشة، وسبب التغييرات برضه إن فيه لعيبة كتير لازم تطلع من الملعب بسبب التعب والمجهود، وده مش فني خالص، إحنا لسه يعتبر في حالة إعداد.
وأشار إلى أنه لا يريد تقديم أعذار، قائلًا: أنا مش عايز أدي أعذار، لكن إحنا النهارده نعتبر دي البداية بتاعتنا، وإن شاء الله ربنا يكرم.
وأضاف: أنا قلت للاعيبة قبل الماتش إن خلاص إحنا تقريبًا لعبنا 4 ماتشات، ودي كافية جدًا، وإحنا زينا زي غيرنا هندخل فورمة المباريات، ومش عايزين يبقى فيه حجج وأعذار ونضيع الدوري.
وعن الانتقادات للاعبي الزمالك بسبب زيادة الأوزان أو عدم التركيز، شدد معتمد جمال: مفيش حد بيلعب لنفسه خالص، فيه لعيبة أوقات ما بتبقاش موفقة، وده بيحصل، ومش معنى إن لاعب عمل ماتشين مش موفقين، سواء الناس اللي بتنتقد ناصر منسي أو أحمد شريف، إن ده معناه إن اللاعب وحش.
واختتم تصريحاته قائلًا: لا، مفيش حد وزنه زايد، وأنا كل يوم بوزن اللعيبة، ويمكن الصورة أوقات بتبقى خادعة، فيه لعيبة بعد راحة طويلة ما بتبقاش موفقة، وده طبيعي، وأنا مش هدي ودني لحد، وأنا بساند كل اللعيبة، لأن هما دول اللي هيدونا الدوري.
