رضا عبد العال: “جونياس هيعملك في الزمالك اللي عمرك ما شوفته”

علق رضا عبد العال، المدير الفني لفريق طنطا، على الأسماء المرشحة لتدريب نادي الزمالك، خلفًا للفرنسي باتريس كارتيرون، مشيرًا إلى أن جميعهم سيفشلوا.

وقال رضا عبد العال في تصريحات لـ”القاهرة 24″: “كارتيرون رحل عن الزمالك لأنه يعلم جيدًا أنه لن يتوج ببطولة دوري أبطال إفريقيا”، مشيرًا إلى أنه “مدرب قليل جدًا”.

وأضاف عبد العال: “جمهور الزمالك كان أكثر جمهور بيفهم كورة، مش عارف دلوقتي حصل ليهم إيه”.

وعن المرشحين لتدريب للزمالك قال مدرب طنطا: “هو مش جروس ده سابك وهرب راح السعودية وفشل هناك، تجيبوا تاني ليه ده مبيعرفش يغير ولا بيعرف أي طريقة، ده ضيع أسهل دوري في تاريخ الزمالك، جيبوه هيفشل ويخسركم البطولة وهيمشي”.

وعن فيريرا قال عبد العال: “نسيتوا لما كان الزمالك فارق عن الأهلي بـ 12 نقطة وخلص الدوري فارق 6 نقاط، وكسب الكأس بالحظ، وهرب في أول الموسم قبل كده، وسيبك من الجمهور”.

وعن باتشيكو قال عبد العال: “مش هرب هو كمان قبل كده، ولو هتحط شرط جزائي كبير أنت اللي هتقيلوا وهتدفع الشرط الجزائي”.

وواصل عبد العال: “تعاقدوا مع تاكيس جونياس وهيخلي طارق حامد حريف كرة، مدرب كبير، والله هيعمل شغل عمرك ما شوفته”.

واستمر: “تخيل جونياس عمل إيه مع وادي دجلة بلاعبين بـ 3 و 4 جنيه ما بالك يمسك نجوم الزمالك بملايين الجنيهات، ومفيش بطولة تعدي من تحت ايده”.

مرتضى منصور: فيريرا وارد يعود من جديد لقيادة الزمالك