أحمد يونس يستنكر شائعات وفاته: طلع عليا إني مُتّ 3 مرات| فيديو
أعرب الإذاعي أحمد يونس، عن استيائه الشديد من كثرة شائعات وفاته مؤخرًا، مطالبًا جمهوره ومحبيه بتحري دقة الأخبار قبل نشرها.
وقال خلال لقائه مع القاهرة 24: طلع عليا إني مت 3 مرات ومرة منهم كان باص العمرة اللي قدامي اتقلب، والناس قالت إني مت فيه، مع إن الباص اللي أنا راكب فيه محصلوش حاجة، والمرة التانية كنت نايم صحيت من النوم لقيت الناس بتقول إني مُت.
وعلى جانب آخر، دائما ما تتداول شائعات بوفاة أحمد يونس خاصة مؤخرا، وذلك بعد تعرضه لحادث نتج عنه قطع في أوتار قدمه، وخضوعه لعملية جراحية.
وكتب أحمد يونس عبر حسابه الشخصي بموقع التواصل الاجتماعي فيسبوك: مش معقول هوس الريتش يوصلنا للمرحلة دي؟ أنا والله ما فارق عندي واللي مكتوب لي هشوفه والموت حق، بس لما أصحى ألاقي الناس عمالة تبعت لي، أنا مش بعرف أرد على التليفون طول الوقت وفي ناس هتاخد العنوان المزيف وتنقله.
وأضاف أحمد يونس: في ناس بيدوروا على الأخبار على جوجل لما ينط ده في وشهم مش هيقروا اللي جوا، لأن العنوان قايم بالواجب وللأسف مش أول مرة تتعمل.
واستكمل أحمد يونس ممازحًا: للعلم وبالعند فيكم أنا الحمد لله بتحسن وهيطلع لي رجل جديدة بس اصبروا شوية، الله يهديكم بجد.. البركة في السند جروب عيلة أحمد يونس دايمًا قايمين بكل واجب والله.
وتابع أحمد يونس حديثه قائلًا: وعلى الجانب الآخر ألف شكر للصحافة والمواقع المحترمة وأهل الميديا اللي سألوا وتحروا الدقة في نقل أي حاجة، هو الحقيقة أنا أقل من ينزل عني أخبار، والموضوع الحمد لله ربنا لطف فيه لطف عظيم، بس كتر ألف خيرهم.
تعرض الإعلامي أحمد يونس لحادث سير
وسبق وكشفت مؤخرًا الصحفة الرسمية للإعلامي أحمد يونس عبر فيس بوك، عن تعرضه لحاث سير، وكتبت: الحمد لله أحمد يونس خرج من العمليات بسلامة الله بعد تعرضه امبارح بالليل لحادث أدى لقطع في أوتار قدمه واستلزم تدخل جراحي.
