ملك زاهر عن شقيقتها ليلى: بحسها بنتي رغم إن الفرق بينا سنة
أعربت الفنانة ملك زاهر، عن مشاعرها تجاه زواج شقيقتها ليلى، مؤكدة أن علاقتهما القوية جعلت من فكرة استقلال كل منهما بحياتها أمرًا مؤثرًا بالنسبة لها.
وقالت ملك في لقائها مع القاهرة 24: أنا وليلى متربطين ببعض أوي، وإحساس إن كل واحدة فينا ليها حياتها شوية خضتني، لكن بدأت أتأقلم لأني مبسوطة لها.
وأضافت: ليلى بحسها بنتي رغم إن الفرق بينا سنة، عملت اللي بتحبه، واتجوزت الشخص اللي بتحبه، ويا رب تعيش معاه في سعادة وهناء العمر كله، فرحانة لها جدًا، وده اللي مصبرني.
وتحدثت ملك عن تفاصيل مؤثرة من حفل الزفاف، مشيرة إلى أن زوج شقيقتها هشام، كان يستعد لغناء أغنية أنا وليلى بنفسه، لكنه تفاجأ بمشاركة الفنان حسين الجسمي، قائلة: هشام قعد 4 أيام قبل الفرح مش بينام علشان يغنّي الأغنية في الفرح، لكن حسين الجسمي فاجئنا كلنا وقدمها، ليلى كانت حابة الفرح يفضل بريفيت لحد ما يخلص، والحمد لله الفرح كان جميل زيها.
ملك أحمد زاهر: مش مصدقة إن الوقت جري ده إحنا كنا لسه بنتخانق على اللبس ونستخبى من ماما
وفي وقت سابق، شاركت ملك زاهر جمهورها فرحتها بحفل زفاف شقيقتها ليلى زاهر على المنتج هشام جمال برسالة مؤثرة.
وكتبت: من أول ضحكة وإحنا أطفال لحد لحظة كتب كتابك.. كل لحظة في الفيديو ده هو عمر كامل بينا، هو حب، وأمان، وضحك، ومشاركة، علاقتي أنا وإنتي مش شبه أي حد، ومحدش فيهم عاش اللي أنا وانتي عشناه.. مش مصدقة إن الوقت جري كده.. كنّا لسه صغيرين، وبنتخانق على اللبس، وبنستخبى من ماما، وفجأة لقيتك لابسة فستانك الأبيض، أحلى عروسة شافتها عيني.
وأضافت: أنا بحبك أوي، حب مفيهوش شروط ولا حسابات، مع إن الفرق بيننا مش كبير، أقل من سنة، بس طول عمري حاسة إنك بنتي مش أختي، قائلة: امبارح بنتي اللي كانت بتتجوز مش أختي، وأنا الفرحة مش سيعاني، بس في نفس الوقت وحشتيني قوي من دلوقتي.
