نجل نبيل الحلفاوي عن تقديم سيرة والده الراحل: مش هقبل حد يعمل شخصيته.. هيقنعني إزاي إنه أبويا؟
علق المخرج خالد الحلفاوي، على إمكانية تقديم السيرة الذاتية لوالده الفنان الكبير الراحل نبيل الحلفاوي، الذي رحل عن عالمنا في ديسمبر الماضي 2024، بعد صراع مع المرض.
ورد خالد الحلفاوي، على السؤال حول من يمكنه تقديم السيرة الذاتية للراحل نبيل الحلفاوي، حيث قال في بودكاست مع رغدة: عمري ما هشوف ولا هتقبل حد يقدم شخصية والدي نبيل الحلفاوي، مين هيقنعني إنه أبويا؟، ممكن أكتب السيرة الذاتية ولكن حد غيري يخرجها.
كما تحدث خالد الحلفاوي، عن مشاركة والدته الفنانة فردوس عبد الحميد، في أعماله الفنية، قائلًا: ببقى متوتر لما والدتي بتشارك في عمل من إخراجي، ببقى خايف عليها وعايزها مرتاحة وطالعة بشكل كويس وتبقى راضية عن العمل.
خالد الحلفاوي: المفروض المخرج ميتصنفش.. وحاسس أني اتزنقت في الكوميدي
وكان تحدث المخرج خالد الحلفاوي، عن حصره في الأعمال الكوميدي، قائلًا: إحنا عندنا سيستم في مصر غريب في المنتجين، إن اللي نفع في حاجة خليه هنا مش هنجربه في حاجة تانية، في مخرج بتاع أكشن ومخرج بتاع كوميدي ومخرج بتاع دراما، وأنا كسول ومش من النوع اللي أكتب وأدور، لأ اللي بيجيلي بختار منه وبالصدفة أول حاجة جاتلي كانت كوميدي فيلم زنقة ستات، ولكن المخرج مش المفروض يُصنف ويقدر يعمل أي حاجة.
وتابع خالد الحلفاوي: أنا مش راضي وحاسس أني اتزنقت ووقت كتير راح في حاجة مش عايز أقول مكررة لأن كل عمل مختلف عن التاني، ولكن في كبت حد يخرجني من الحفرة دي يا جماعة.
