مصمم يشرب الشوربة مولعة.. تعليق قوي من شوبير على أزمة أحمد فتوح
وجه الإعلامي أحمد شوبير رسالة إلى أحمد فتوح لاعب الزمالك بعد أزمته الأخيرة بظهوره في حفل بالساحل الشمالي، عقب غيابه عن معسكر إعداد الفريق بالعاصمة الإدارية.
شوبير يوجه رسالة إلى أحمد فتوح
وقال شوبير في تصريحات إذاعية: عندنا مثل شعبي بيقول (اللي اتسلع من الشوربة بينفخ في الزبادي) لكن أحمد فتوح مصمم يشرب الشوربة وهى سخنة مولعة، علشان تعمله مشاكل كتير.
وأضاف: اللي عمله الزمالك مع أحمد فتوح في أزمة الأخيرة الصيف الماضي موقف يحسب للنادي حتى لو الفلوس المدفوعة كانت من المحبين وليس النادي نفسه، لكن إن فتوح يرجع والنادي يجهزه ويبدأ يدخل مع الفريق تاني فدا يحسب للنادي، وصحيح أن الحادث كان قضاءًا وقدرًا، لكن كان له ملابسات معينة لا داعي التطرق لها.
وواصل شوبير تصريحاته: لكن بعد اللي عمله النادي، أنت يا فتوح بتعمل كدة رغم إنه لم يقصر في حقك على الإطلاق، وقولت إن هتخرج علشان عمك تعبان، وبعدين الناس تتفاجئ إنك في حفلة، لو عايز تروح أي مكان لازم كنت تعرف النادي.
وأكمل: مش هينفع يا فتوح، أنت لاعب مهم وضروري وليك دور في المنتخب مش قليل، فأنت عايز إيه؟، لو تعلب كرة فلازم تحترم الجماهير والزمالك وإدارة النادي، لكن لو عايز تسهر والدنيا حلوة بالنسبالك خلاص مش هينفع تجمع بين الاتنين، والكلام لكل اللاعبين في مصر، طالما عندك معسكر ونظام وتدريبات مينفعش تبعد عنه.
واختتم شوبير تصريحاته قائلا: قرار جيد من الزمالك تغريم اللاعب مليون جنيه وإيقاف مستحقاته وتحويله إلى التحقيق، وقبل كده الكلام دا كان بيكون على ورق دون تنفيذ لكن الأن الأمور أصبحت مختلفة.
