تفاصيل الحالة الصحية لـ ميار الببلاوي عقب نجاتها من حريق منزلها
كشفت الفنانة ميار الببلاوي، تفاصيل حالتها الصحية بعد نجاتها من حريق نشب بمنزلها خلال الأيام الماضية، موضحة أنها تعرضت لأزمة بالتنفس بسبب تصاعد الأدخنة.
وقالت ميار الببلاوي، في تصريح خاص لـ القاهرة 24: كان عندي أزمة في التنفس من بعد الحريق اللي حصل في البيت بسبب إصابتي بـ الربو والالتهاب المزمن في الشعب الهوائية، رجعت من المستشفى النهاردة الساعة 3 الفجر، ربنا يعدي السنة دي على خير شفنا فيها اللي محدش شافه.
تفاصيل نجاة ميار الببلاوي من حريق منزلها
ومن ناحية أخرى، سبق وكشفت الفنانة ميار الببلاوي، تفاصيل نجاتها من حريق بـ مطبخ منزلها خلال الساعات الماضية، حيث نشرت ميار الببلاوي، مقطع فيديو عبر حسابها بـ فيس بوك، أظهرت خلاله آثار الحريق، وكتبت: ربنا نجاني أنا وابني بأعجوبة، الحمد لله قدرنا نتصرف والنار ممسكتش في بقية المطبخ بس خضة صعبة أوي، كان ماس ونار مش قادرة أتنفس الدخان كان مالي البيت، طفاية الحريق مهمة جدًا يا جماعة ربنا يستر على الجميع.
وأضافت ميار الببلاوي: مكنتش عارفة اتصرف والنار طالعة من كل مكان وجنب محبس الغاز ومش عارفين نقرب من البوتاجاز لأن كان فيه ماس كهربائي وكنت خايفة على ابني يدخل وسط النار، بس هو ربنا يحميه لولا فكر واستعمل طفاية الحريق كانت هتبقى كارثة.
