اشتغلت كل حاجة.. عبد الله مشرف يكشف أسباب ابتعاده عن الساحة الفنية
كشف الفنان عبد الله مشرف أسباب ابتعاده عن الأعمال الفنية، مؤكدا أنه يعيش حاليا ما يشبه إجازة مفتوحة دون وجود رغبة محددة في خوض أعمال جديدة، مشيرا إلى أنه قدم خلال مسيرته الفنية العديد من الأدوار التي تشبع منها.
وقال عبد الله مشرف، خلال حديثه في برنامج كلام الناس، الذي تقدمه الإعلامية ياسمين عز، على شاشة قناة MBC مصر: تقدروا تقولوا إني في إجازة مفتوح، ومفيش عمل معين عايز أشتغل فيه، الحمدلله أنا اشتغلت كل حاجة.
وسبق وأعلن الفنان اعتزاله التمثيل نهائيا، موضحا في تصريح خاص لـ القاهرة 24 أنه يفضل قضاء وقته مع نفسه وأسرتة، وقال: الناس كلها لازم تعرف إن كل واحد ليه وقت يقعد ويعيش حياته، وأنا دلوقتي عايش حياتي مع نفسي والأسرة.. ومش هرجع تاني.. هرجع تاني ليه؟
وأضاف: أنا اللي طالب الاعتزال، ومسيرتي عملتها وقدمتها خلاص وانتهت الحمد لله، اكتفيت وشبعت، ومقدرش آكل أكتر من طاقتي في الشغل، واللي هوحشه وعاوز يتفرج عليا يتفرج عليا على التلفزيون.
ومن جانبها، طمأنت ابنة عبد الله مشرف الجمهور على صحة والدها، مؤكدة أنه بصحة جيدة رغم تكرار الشائعات حول مرضه أو وفاته، معربة عن استيائها من تلك الأخبار التي لا أساس لها.
وقالت في تصريح خاص لـ القاهرة 24: والدي كويس وزي الفل الحمد لله وبيتابع الأخبار والتلفزيون، وبيزعل لما بيشوف الشائعات اللي بتتكتب عنه دي كلها حاجات مالهاش لازمة.
وأشارت إلى أن والدها لا يزال يتلقى عروضا فنية، لكنه يبتعد بسبب تقدمه في العمر، مؤكدة حب الجمهور الكبير له ولأدواره المؤثرة، وأضافت: أنا بطمن الجمهور هو بخير وصحة وبيقضي وقته معانا أولاده وأحفاده.
