والد صغير مصاب بضمور العضلات يستغيث لعلاجه: محتاج حقنة بـ 13.5 مليون جنيه
استغاث والد صغير يبلغ من العمر 10 سنوات لعلاجه من مرض ضمور العضلات، حيث يعاني الصغير أمير أحمد سيد، من مرض ضمور العضلات منذ 3 سنوات، ويواجه صعوبات في المشي والحركة، بالإضافة إلى المخاطر والمضاعفات الصحية المرتبطة بالمرض.
والد صغير مصاب بضمور العضلات يستغيث لعلاجه
وقال أحمد سيد، والد الصغير أمير مريض ضمور العضلات، في تصريحات خاصة لـ القاهرة 24: اكتشفت المرض من 3 سنوات، لما أمير واجه صعوبات في الحركة خلال اللعب، وقتها كنا في الملاهي ولقيته بيتحرك بشكل مش طبيعي، ولما سألته رجلك مالها قالي بتوجعني ولاحظت صعوبة في حركته، وفحصته وقتها ملقتش حاجة في رجله.
وأضاف: ركزت معاه وفي حركته فيما بعد، لقيت إنه بيطلع السلم بصعوبة، وكشفت عليه وكنت متوقع إن الدكتور يشخصه بنقص كالسيوم وفيتامينات وعناصر غذائية، لكن الدكتور قالي لازم تكشف عند دكتور عظام، ودكتور العظام طلب أشعة وتحاليل لأنه شك إنه مصاب بضمور العضلات، وحولني على القسم المختص بمرض ضمور العضلات في مستشفى الدمرداش، وهناك الدكاترة فعلًا أكدوا لي أن أمير مريض ضمور العضلات دوشين، ومحتاج لـ حقنة تكلفتها 13 مليون و500 ألف جنيه.
وأردف والد الصغير أمير مريض ضمور العضلات دوشين: الدكاترة قالولي عضلات الجسم بتتاكل كل ما بيكبر في السن، وهيجي عليه وقت والمرض يأكل في العظام والرئة، وطلبت مني تحليل جيني، ووصوفوا له حقنة Exondys 51، ولكن سعر الحقنة فوق الإمكانيات المادية لأي أسرة لأنها بحوالي 13 مليون جنيه وسعرها زاد نص مليون جنيه الفترة اللي فاتت، عشان كدا اتجهت لجمع التبرعات وفتحت حساب تحت إشراف وزارة التضامن الاجتماعي، لجمع تكلفة الحقنة قبل ما سنة يكبر والمرض يتطور.
