أول تعليق من مدير جولدز جيم: المتهم ضربني بطلق ناري وبعصا بيسبول.. وقال كلامي لازم يتنفذ
كشف مدير صالة جولدز جيم بمدينة الشيخ زايد، تفاصيل واقعة إصابته بطلق ناري داخل الجيم، مؤكدًا أن الحادث جاء نتيجة تهديدات سابقة ومشكلات متراكمة مع مجموعة من الشباب.
مدير جولدز جيم يكشف تفاصيل الواقعة
وقال مدير الجيم، في أول تصريح له لـ القاهرة 24، إن الخلاف الأساسي كان بين 5 شباب منذ فترة سابقة، موضحًا: وقت المشكلة الأولى كنت مسافر العمرة، وبعد ما رجعت حاولوا يعملوا مشكلة ويضغطوا علشان يدخلوا يتدربوا في الجيم، وعشان مش عايز مشاكل، قولتلهم مش هتدربوا هنا، وأنا على حسابي هبعتكم جيم تاني وأديكم أسبوع اشتراك هدية، مقابل إن الموضوع يخلص، وبالفعل مشيوا.
وأضاف: بعدها بساعة جالي اتصال تليفوني من المتهم، قالي: انت متعرفش أنا مين، والكلام اللي بقوله لازم يتنفذ، ومحدش يقدر يكسر كلامي، وإن الخمسة شباب هيدخلوا الجيم غصب، ولو مدخلوش سألني أنا فين وقالي أنا جاي لك.
وأشار مدير الجيم إلى أن المتهم حضر بالفعل وكان بحوزته سلاح ناري، وهدده قائلًا: جالي ومعاه مسدس، وهددني وضرب طلقة في رجلي، وضرب باقي الطلقات في الهوا، وكان عايز يضربني طلقة في صدري ويقتلني.
وأوضح: حاولت أمسك المسدس منه وآخده، فخرجت 4 طلقات في الهوا وبعدها مسك عصاية بيسبول وضربني على دماغي، وفقدت الوعي وهو هرب.
وفي وقت سابق، أعلنت الأجهزة الأمنية القبض على المتهم في الواقعة، فيما تواصل جهات التحقيق الاستماع لأقوال الأطراف، وتفريغ كاميرات المراقبة، واستكمال التحقيقات للوقوف على ملابسات الواقعة كاملة.
