أول تعليق من فتاة قطعت يديها خلال العمل على ماكينة جبن بسوبر ماركت بأكتوبر: إدارة المكان مسألتش فيا.. وعايزة حقي| خاص
استغاثت فتاة تدعى سلمى مجدي شعراوي، تبلغ من العمر 20 عامًا، بعد تعرضها لإصابة عمل داخل سوبر ماركت شهير، وذلك خلال تأديتها مهام عملها كمسوقة لأحد أنواع الجبن الخاص بإحدى الشركات، حيث تعرضت لبتر شبه كلي في كف اليد نتيجة تقطيع الجبن بماكينة البسطرمة التي تعمل بالكهرباء، والتي كانت تفتقد لمعايير السلامة والأمان.
أول تعليق من الفتاة صاحبة استغاثة قطع اليد بسبب تقطيع الجبن في سوبر ماركت شهير
وقالت سلمى شعراوي الفتاة التي تعرضت لإصابة خطيرة باليد خلال العمل بسوبر ماركت شهير بفرع السادس من أكتوبر، في تصريحات خاصة لـ القاهرة 24: كنت موجودة في السوبر ماركت لتسويق أحد أنواع الجبن خاص بشركة ما، وتم إجباري من إدارة السوبر ماركت على تقطيع الجبن على الرغم أنه من غير اختصاصي، واتقالي اشتغلي وبطلي دلع.
وأضافت سلمى شعراوي: اتخذت الإجراءات القانونية ضد السوبر ماركت وعملت محضر في قسم أكتوبر ثاني برقم 6300، وتم إثبات حالة وخضعت لـ 20 عملية جراحية، وآخر عمليتين يوم 14 يناير الماضي، أنا حصلي بتر شبه كلي ومفيش حاجة سليمة في كف إيدي، حتى العصب والأوتار اتقطعوا، وعملت أول عملية في شهر 8 الماضي وفضلت وقتها حوالي 12 ساعة في العمليات، والدكاترة قالوا إني تعرضت لعاهة مستديمة، وايدي مستحيل ترجع بشكلها الطبيعي تاني.
واستكملت: سمعت صوت عظمي بيتكسر أول ما الماكينة كلت إيدي، وحاليًا بعمل جلسات علاج طبيعي ولكن إيدي مش مستجيبة للعلاج، والوجع صعب وبيعذبني، أنا خدت كل المسكنات اللي في الدنيا ومفيش فايدة، المكنة سحبت كف إيدي وأنا واقفة شغالة مهام من غير اختصاصي، والناس كلها واقفة تتفرج عليا، ومدير الفرع كل اللي عمله وقتها شال إيدي من الماكينة ولفها في تيشرت، وكل الناس في السوبر ماركت كانت واقفة تتفرج عليا، واللي عرفته بعد كده إن ماكينة الجبنة مكنش فيها أمان ولا عليها رقابة، وكل العمال في السوبر ماركت كانوا عارفين إن مكنة تقطيع الجبنة والبسطرمة فيها مشكلة ومع ذلك تم إجباري على استخدمها.
واختتمت: محتاجة حقي والمسؤولين في السوبر ماركت يتحاسبوا، أنا بتعذب من الألم النفسي والجسدي، ومحدش منهم كلمني ولا أهتم بأمري ومشكلتي، وهددوا كل عمال السوبر ماركت اللي شهدوا الواقعة.
