مي فاروق عن زواجها الأول: تجربة تركت ضررًا داخليًا رهيبًا.. وشكيت في نفسي وشكلي وموهبتي
تحدثت المطربة مي فاروق، عن تجربة زواجها الأول، موضحة أنها كانت تجربة مريرة استمرت لـ 12 عاما، وأنها فقدت الثقة بمن حولها وبموهبتها بعدها.
وقالت مي فاروق، في تصريحات تليفزيونية: الجواز ده نتج عنه أحلى حاجة في عمري أولادي زينة ومالك، الزواج ده استمر 12 سنة، وبالنسبة لـ مي لوحدها بعيدًا عن الأمومة، الأسود كان كتير في الـ 12 سنة دول، أنا مكنتش عندي تجربة وطول الوقت مقفول عليا، ودي كانت أول تجربة حقيقية أمر بيها.
مي فاروق تروي تجربتها مع زواجها الأول
وتابعت مي فاروق: التجربة دي تركت فيا ضرر داخلي رهيب، مريت بـ تجارب نفسية عمري ما كنت أتخيل أني همر بيها، وكنت بعديها لأني أم، وصعوبة الموضوع انعكس على نفسيتي وبدأت تخليني أفقد الثقة في الناس وفقد الثقة تمامًا في نفسي وكنت شخصية مهزوزة جدًا.
وأضافت مي فاروق: شكيت في نفسي وشكلي وموهبتي وأني أصلًا أصلح أغني، أنا بغني ليه؟، أنا مش عايزة حاجة، كنت فاقدة الثقة في كل حاجة في حياتي، كان عندي إحساس بنسبة 99% على مدار 24 في اليوم أني حالًا هموت وأسيب ولادي، كان عندي رعب، والتربية القديمة بتاعتنا أن البنت مينفعش تتطلق وتكمل علشان الأولاد ده أكبر مبدأ غلط في الدنيا، أنا اتربيت أن البنت بتطلع من بيت أبوها على بيت جوزها على التربة، أنا انفصلت أول مرة برضا والدي لما بنتي كانت عندها 5 سنين، ورجعت بسبب إحساس بالذنب، وربنا رزقني بـ مالك، وانفصلت تمامًا في 2018، وكان سهل جدًا أطلب الطلاق لأن المكان مش مكاني.
واستكملت: إيه اللي هضحي علشانه وأكتر من 12 سنة من عمري وفي الآخر أفقد نفسي وولادي عايزني، عديت بمواقف عمري ما كنت أتخيل أني هعدي بيها، أنا طالعة بـ بنوتة عندها 11 سنة وبتبدأ سن مراهقة، وطالعة بيهم عندهم شوية مشاكل من الانفصال، اللي عيشته كان قاتل، أنا بموت نفسي وولادي كانوا هيعيشوا يتامى الأم.
