مخرج مسلسل سوا سوا يكشف كواليس مشهد مشاجرة أحمد مالك: خرج عن السيطرة وكنا خايفين يضربنا
كشف المخرج عصام عبد الحميد، كواليس مشهد مشاجرة أحمد مالك، في مسلسله سوا سوا، الذي يعرض حاليًا بالسباق الرمضاني عبر شاشة MBC مصر، وحقق نجاحًا منذ عرض أولى حلقاته.
وأوضح عصام عبد الحميد، في تصريحات تليفزيونية، أن أحمد مالك اندمج بالشخصية إلى حد كبير، قائلًا: خرج عن السيطرة كممثل وكنا خايفين يضربنا إحنا شخصيًا جوا الخناقة، وكان جوا الحالة جدًا.
وأضاف: في النهاية إحنا لوكيشن روحه لذيذة ومرتبطين ببعض، وبنعرف لما حد يوصل لمرحلة كبيرة من الضغط أول الانفعال بنعرف كلنا نهديه.
من جانبه، سبق وكشف أحمد مالك، كواليس مشهد المشاجرة، قائلًا: بفصل الشخصية اللي بعملها عن شخصيتي الحقيقية دي شغلانة، الدكتور بيمارس مهنته وطبعًا الدكاترة شغلتهم أهم بكتير بينقذوا حياة بني آدمين وإحنا بنعمل فن يعني، وبس بقارن مهنة بمهنة، بيدخل يعمل عملية ويروح بيته مش بياخدها معاه، والواحد اللي عنده حرفة في التمثيل بيعرف لما يرجع لـ لبسه ويطلع من اللوكيشن خلاص دي شغلانة خلصتها.
وأضاف: هو بس الواحد يبقى حقيقي وعنده ضمير في شغله ويقدمه بأحسن شكل، وده شغفي في المهنة أني أبقى صادق وحقيقي ويارب الناس تصدق اللي أنا بحاول أقدمه دي أمنيتي.
وأردف أحمد مالك: كل مشهد ظروفه مختلفة ممكن يكون طالب حالة من السعادة أو الحزن والواحد يكون ملتزم بـ ده ويكون مقدر اللي حواليه ميقولش أنا جوا المشهد ومجنون ده غلط.
