أحمد بحر كزبرة: الشباب لازم يتحملوا وتشتغلوا.. ومتقولوش الأجر قليل
شارك الفنان أحمد بحر كزبرة، بطل مسلسل بيبو المعروض حاليًا ضمن السباق الرمضاني، ذكريات عن شخصيته في العمل وحياته الواقعية، مؤكدًا أنه يشوف بيبو في صحابه من الطفولة، ويلاحظ عندهم كبرياء حتى في أصعب المواقف.
وأضاف أحمد بحر كزبرة في لقاؤه مع القاهرة 24: تلاقي واحد قاعد على السلم، ولما تقول له روح اشتغل تحس عنده كبرياء، ويقولك: لو اشتغلت هاخد 8 أو 10 آلاف، هدفعهم مواصلات وأكل وشرب.
وتابع: لازم تقوم تشتغل ومتقولش الأجر قليل، لأن ربنا ممكن يفتحلك باب أكبر".
واختتم بحر كزبرة حديثه بتوجيه رسالة للشباب: الصبر مطلوب، ولازم تتحمل لأن الحياة مش سهلة، والشغل والاجتهاد هما الطريق لفرص أكبر ومستقبل أفضل.
تصريحات كزبرة
وكان أكد بحر في لقاؤه مع القاهرة 24، أن الشخص الذي يعرف هدفه يسير بثبات دون الالتفات إلى الخلف، مضيفًا: أنا عارف أنا عايز إيه ومكمل، وببص لربنا ومش ببص ورايا، الإنسان اللي طالع من ظروف صعبة عمره ما يحب يرجع يعيشها تاني.
واختتم كزبرة حديثه بالتأكيد على أن الفرص قد لا تتكرر كثيرًا لمن يأتون من ظروف صعبة، لذلك يجب استغلالها، موضحًا: اللي زينا حياتهم مفيهاش فرص كتير، وربنا بيدينا فرصة لازم نستغلها، أنا جاي من حتة صعبة ومش حابب أعيشها تاني، أهالينا بيعملوا اللي عليهم ويمكن يبيعوا من نفسهم علشان يعيّشونا، بس في الآخر القرار لازم يكون قرارك أنت.
