تأجيل محاكمة المتهمين في قضية مقتل سيدة بولاق الدكرور لجلسة 8 أغسطس للاطلاع

قررت محكمة جنوب الجيزة، اليوم 6 يونيو، تأجيل أولى جلسات محاكمة المتهمين في واقعة مقتل سيدة داخل مسكنها بمنطقة بولاق الدكرور بالجيزة، والمعروفة إعلاميًا بـ جريمة النقاب، لجلسة 8 أغسطس للإطلاع.

محاكمة المتهمين بإنهاء حياة سيدة في بولاق الدكرور

وكشفت التحقيقات في واقعة مقتل سيدة داخل مسكنها بمنطقة بولاق الدكرور بالجيزة، والمعروفة إعلاميًا بـ جريمة النقاب، أن المجني عليها خالة المتهم الأول والعقل المدبر للواقعة، وأنهى حياتها هو وصديقه لسرقة منزلها، ودبر لهذه الجريمة بارتداء نقاب نسائي كي لا تكشف هويتهم.

وقال المتهم أمام جهات التحقيق: أنا كنت مستلف فلوس من زوج خالتي "المجني عليها" وكان فيه ناس تاني مستلف منهم فلوس.

وأضاف المتهم: مكنتش ملاحق على الطلبات ولا على سداد فلوس الناس اللي مستلف منهم، ومنهم زوج خالتي كان ليه 110 آلاف، ورغم إني كنت بحبها وكانت طيبة معايا بس كنت مكسوف أروح عندها علشان الفلوس دي.

وأكمل المتهم أنه كان يعمل موزع مواد غذائية، مردفا: فيه شركة بطلت تديلي بضاعة علشان بتأخر في السداد، فاتكلمت مع المتهم التاني علشان هو قريبي وصاحبي، وإحنا الاتنين ظروفنا وحشة.

وأردف المتهم: اقترحت على شريكي إننا نسرق، علشان مفيش حل تاني، وقولتله هنسرق خالتي علشان ظروفها كويسة، وهناخد جزء من اللي معاها نفك بيه زنقتنا وهي مش هتتضر.

وأكمل: حطينا خطة للسرقة، وأنا عارف إنه علشان ندخل العمارة لازم يكون معانا مفتاح وكمان نختار وقت محدش يكون في البيت غير خالتي، وكان لازم نلبس حاجه تداري وشنا علشان متعرفناش لو شافتنا.

واختتم: روحت لخالتي قبلها بيوم وأخدت مفتاح العمارة وعرفت الذهب والفلوس فين، واخترنا يوم محدش بيبقى في البيت غير خالتي، واخترنا الوقت بعد 10 الصبح علشان هي تكون رجعت لأنها بتنزل تجيب خضار قبل الوقت ده.