نجل المسنة ضحية القتل بشبين الكوم: رجعت من شغلي لقيت أمي مقتولة ومسروقة
أحالت جهات التحقيق المتهم بقتل مسنة لسرقتها بمنطقة شبين الكوم للمحاكمة الجنائية، بتهمة القتل العمد، بعدما حاول سرقة المجني عليها خلال نومها داخل إحدى العشش.
أقوال نجل المسنة ضحية القتل بشبين الكوم
وقال نجل المجني عليها في التحقيقات: اللي حصل إن أنا بشتغل غفير على حديد في ميت خاقان وإمبارح كنت مع أمي واتعشينا على الساعة 9 بالليل وبعد ما خلصنا العشاء روحت أنا عشان أشوف شغلي وسبت أمي في العشة وخلصت شغلي على الفجر ولما رجعت لقيت أمي مرمية على وشها في العشة وفي دم كتير أوي واقع على المخدة.
وأضاف: أنا شوفت المنظر خوفت وصرخت وطلعت جريت على أول الشارع وكلمت أختي عفاف عشان تشوف في إيه، فأختي جاتلي بعدها بربع ساعة تقريبًا، ولما جت عفاف هي اللي راحت شافت أمي وقلبتها على ضهرها ولقينا في تعويرة كبيرة كدا في رأسها من فوق وبتنزل دم كتير وأختي فتشتها لقت إن الفلوس اللي في جيبها والفلوس المتعودة تحطها في صدرها والموبايل بتوعها مش موجودين فكلمنا الإسعاف عشان تيجي تلحقها ولما الإسعاف جات لقوها ميتة وبلغوا الشرطة والمأمور خدني على القسم وعملوا المحضر وقولتلهم على كل اللي شوفته وده اللي حصل وأنا معرفش مين اللي عمل كدا في أمي.
وتنظر محكمة جنايات شبين الكوم، غدًا، أولى جلسات محاكمة المتهم بقتل مسنة داخل مسكنها بمدينة شبين الكوم بمحافظة المنوفية، بعد أن أحالته النيابة العامة إلى المحاكمة الجنائية، لاتهامه بقتل المجني عليها عمدًا بقصد سرقتها.
