اعترافات المتهمة بتشويه وجه عروس مصر القديمة: مشاكلنا بدأت بعد ما باركتلها على جوازها من طليقي| خاص
كشفت التحقيقات في واقعة اعتداء سيدة - مطلقة - على عروس طليقها وتدعى منصورة، وتشويه وجهها باستخدام شفرة حادة، قبل أيام قليلة من موعد زفافها بمنطقة مصر القديمة، تفاصيل الواقعة.
اعترافات المتهمة بتشويه وجه عروس مصر القديمة
وحصل القاهرة 24 على التحقيقات في قضية تشويه وجه عروس مصر القديمة، وبمثول المتهمة مريم. ا. ع. ا أمام جهات التحقيقات المختصة، متي وأين حدث ذلك؟
أجابت: هي نزلت المنشور من حوالي عشر أيام والخناقة كانت يوم الأحد اللي فات الساعة 10 بالليل في عزبة خير الله عند المعهد الديني وانا اتاخدت من بيت طليقي في المطرية.
س: ما مناسبة وجودك بالأماكن والأزمنة آنفة البيان؟
ج: روحت عند بيتهم عشان أعاتب أم منصورة على غلط بنتها فيا ومصطفى كان مفهمني إنهم هيأدبوها راحوا مسكو فيا وشدوني من الطرحة وبعد منصورة ما اتعورت أنا خفت ورحت أقعد عند خالتي لحد ما طليقي كلمني ورحت بيت طليقي بعدها بيومين وقعدت عنده.
س: من كان برفقتك آنذاك؟
ج: وقت ما المشكلة حصلت كان معايا مصطفي.و.ع، ولما اتمسكت كان معايا طليقي أحمد.س، وشهرته أحمد الأبيض.
س: ما علاقتك بالمجني عليها منصورة- وهل توجد خلافات سابقة على تحرير المحضر؟
ج: مكنش في أي حاجة بيننا قبل كده هي اللي بدأت مشاكل معايا بعد ما باركتلها على موضوع جوازها من طليقي ده.
س: من القائم بضبطك تحديدًا؟
ج: ناس من شرطة قسم مصر القديمة ومعرفش بياناتهم.
س: هل دار حوار بينك وبين القائمين بضبطك آنذاك؟
ج: لأ.. هما دخلوا بيت أحمد وخدونا.
س هل قام القائمون بضبطك بتفتيشك آنذاك؟
ج: هما فتشوني وأنا داخلة القسم.
س: ما الذي أسفر عنه التفتيش تحديدًا؟
ج: ولا حاجة.
س: هل ثمة علاقة أو خلافات بينك وبين القائمين بضبطك وتفتيشك؟
ج: لا معرفش حد فيهم ومفيش خلافات.
س: ما قولك فيما سطر بمذكرة الضبط المحررة بمعرفتهم؟
ج: محصلش أنا مضربتش حد ومكنش معانا أي أسلحة ومقلتش إني عملت كده.
س من هو محدث إصابة المجني عليها؟
ج معرفش بس مفيش حد كان معاه سلاح غير مصطفى
س: ما قولك فيما قررته استدلالًا وشهدت به المجني عليها منصورة - بتحقيقات النيابة العامة؟
ج: محصلش الكلام ده وهي اللي عملت معايا مشكلة على النت ولما نزلتلهم الشارع بهدلوني وتعدوا عليا وأنا ملمستهاش.
س: ما كيفية التعدي عليك تحديدًا؟
ج: هما شدوني من هدومي وكانوا بيتخانقو معايا.
س: هل نتج عن ذلك حدوث ثمة إصابة بك؟
ج: لا مفيش إصابات فيا.
س: هل لديك سوابق؟
ج: لا.
س: هل سبق اتهامك في قضايا مماثلة؟
ج: لا.
س: هل لديك اسم شهرة؟
ج: لا.
