محمد زهران مرشح الغلابة بالمطرية: بوزع ورق الدعاية بنفسي.. وهدفي أوصل أوجاع الناس للبرلمان |فيديو وصور

أكد الدكتور محمد زهران، المرشح الفردي عن دائرة المطرية لانتخابات مجلس النواب 2025، في أول ظهور له بعد تصدره التريند وإشادة عدد كبير من مستخدمي مواقع التواصل الاجتماعي به، أنه يخوض الانتخابات المقبلة بدافع خدمة الناس ونقل معاناتهم الحقيقية إلى قاعة البرلمان، دون أي أهداف شخصية أو مصالح.

 الدكتور محمد زهران مرشح الغلابة بالمطرية: بوزع ورق الدعاية بنفسي وجزمتي اتقطعت من كتر اللف 

وقال زهران في بث مباشر عبر القاهرة 24: “قررت إني أترشح كعضو مجلس نواب، والهدف هو نقل المشاكل اللي في الشارع ومعاناة الناس وأوجاعهم لمجلس النواب، ونحاول نحلها، والناس اللي مش عارفين يوصلوا صوتهم، وأنا قبل ما أترشح شاركت في دستور 2014، وبعرف إن دور عضو مجلس النواب هو دور تشريعي وخدمي، لكن الدور التشريعي والرقابي هو الأساس”.

وأضاف المرشح لانتخابات مجلس النواب 2025، الدكتور محمد زهران "لما لقيت الـ 30 ألف جنيه بتوع الترشح والـ 10 آلاف بتوع الكشف الطبي، كتبت على صفحتي إني مش هقدر أنزل، فالناس المحبين ليّ قرروا وأصروا إني أنزل، ولمّولي الفلوس."

وتابع الدكتور محمد زهران مرشح الغلابة: "بدأت أنزل كل شوارع المطرية بنفسي، والناس عايزاني، وأنا ساكن معاهم هنا في عرب الطوايل، وعايزين حد حاسس بأوجاعهم، والناس دعموني وعايزين حد منهم، مش حد يوريهم وشه كل أربع سنين مرة".

واستكمل زهران حديثه قائلًا: "أنا معنديش قدرة مالية إني أدفع للدعاية، وحتى لما عملت دعاية ومقر انتخابي  والناس كانوا لمولي ولقيتها مكلفة، خدت الفلوس وطبعت بيها أوراق الدعاية، والبرنامج الانتخابي بتاعي مش عاملك لستة تدغدغ بيها مشاعر الناس، أنا كل يوم في الشارع والناس بتفضل تناقشني وتتكلم معايا في مشاكل محتاجة الناس تسمعها".

وأكمل الدكتور محمد زهران مرشح الغلابة: "جزمتي باظت من كتر اللف وتنيتها علشان متبانش، بس مكمل، لأني مؤمن إن التغيير الحقيقي بيبدأ من الشارع ومن الناس البسيطة".

وأكد مرشح الغلابة أن لديه ملفين أساسيين في أولوياته، وهما الصحة والتعليم، قائلًا: "أنا عندي اهتمام كبير بملف التعليم وبملف الصحة، وده ملف لازم يتفتح ويتناقش بجدية، لأن التعليم هو مفتاح الإصلاح في كل المجالات."

وتابع: "الناس بتسألني ليه بتوزع الدعاية الانتخابية بنفسك؟، لسببين السبب الأول مش معايا فلوس أصرف على الدعاية، والسبب التاني علشان أنا عايز أقابل الناس بنفسي وأسمعهم وجهًا لوجه".

واستطرد زهران تصريحاته قائلًا: "أنا من أول ما قدمت ورقي يوم 6 أكتوبر وأنا بنزل الشارع وبلف على الناس، ووصلت لحد دلوقتي لتوزيع حوالي 48 ألف ورقة أو كارت دعاية على أهالي المطرية، وبوزع في اليوم حوالي 4 آلاف ورقة، والناس عايزة حد يسمعها ويسمع شكواها."

ولفت مرشح الغلابة الدكتور محمد زهران"أهل المطرية جزء من النسيج المصري، والمطرية محتاجة أماكن تتعمل فيها مراكز شباب، ونحاول نوفر فرص عمل للشباب، وكمان نهتم بقصر الثقافة والمبدعين، وفي مساحات ممكن تتعمل فيها مصانع تساعد في تقليل نسبة البطالة."

واختتم حديثه قائلًا: "أنا مرشح الغلابة، نازل علشان الناس اللي محدش بيسمعها، وعلشان أكون صوتهم في البرلمان، مش مجرد مرشح بيعدي كل أربع سنين".