أول تعليق من فتاة البشعة بعد تصدرها التريند: عملتها عشان أظهر براءتي وبعدها اطّلقت| خاص
تداول مستخدمو السوشيال ميديا، فيديو لفتاة تجلس على الأرض لتجري عملية البشعة، وظهرت عليها ملامح الرهبة، وذلك لإثبات مدى صدقها بعد أن اتهمها زوجها بأنها لم تكن عذراء عند الزواج منها.
أول تعليق من فتاة البشعة بعد تصدرها التريند
وقالت الفتاة في تصريحات خاصة لـ القاهرة 24: ببساطة جدًا جوزي كان دائم الاتهامات ليا، وكان شاكك فيا ودايمًا كان بيقول كلام بيضايقني عن شرفي، ولما شوفت على الانترنت أن في حاجة اسمها البشعة ده خلاني أعملها عشان أثبت براءتي قدام زوجي اللي فرحنا كان من 15 يوم بس.
وتابعت: طبعًا إحنا روحنا للشيخ اللي عملي البشعة وده كان طلبي مش من ضغط أهلي خالص أو حد من عيلتي، عشان أرجع لنفسي كرامتي وأرجع لشغلي قدام صحابي والناس اللي عارفاني لأن جوزي أذاني بالكلام بتاعه وده أثر على نفسيتي بشكل كبير.
وأضافت: بعد شكوكه الكتيرة خدت قراري بالطلاق منه، لأن الحياة بينا بقت مستحيلة كمان هو مش بيشتغل خالص، ولما كنت بطلب منه يروح شغل أو ينزل يشوف مستقبله، ومن هنا أصلا بدأ يهني في شرفي ويتهمني بحاجات مش مظبوطة.
واختتمت: طبعا البشعة دي صعبة جدًا واتحملت عشان أرجع أعيش بكرامة قدام الناس وأنزل رافعة رأسي، وأهم حاجة الاختيار الصح قبل أي زواج.
