سيد عبد الحفيظ يفتح النار على حكم مباراة سيراميكا: مش عارف هو كان بيذاكر إيه في القانون
تحدث سيد عبد الحفيظ عضو مجلس إدارة النادي الأهلي، عن الأحداث التحكيمية التي حدثت خلال مباراة الأهلي وسيراميكا كليوباترا ضمن منافسات الجولة الأولى من المرحلة الثانية من مسابقة الدوري الممتاز موسم 2025-2026، والتي انتهت بالتعادل الإيجابي 1-1.
سيد عبد الحفيظ: أنا مش متخيل إن فيه حكم في العالم لا يحتسب هذا الخطأ ركلة جزاء
وقال سيد عبد الحفيظ خلال تصريحات تليفزيونية: أنا ممكن أبقى أوحش فرقة في العالم يا سيدي، بس طالما ليا حق لازم آخده، أنا مش متخيل إن فيه حكم في العالم يقول إن دي مش ضربة جزاء.. أنا مش عارف هو كان بيذاكر إيه في القانون، ومش عارف هو واخد موقف مني ولا إيه، خصوصًا إنه نفس الحكم اللي أدار لينا ماتش الدور الأول، وبصراحة، أنا شايف إنه مش من الحكام الدولية، وكمان اختياره للمباراة عليه علامات استفهام.
وأضاف عبد الحفيظ: من بكرة هيبقى فيه وقفة كبيرة، وكمان هيبقى فيه خطابات وقرارات رسمية، وهنطالب بفتح تحقيق رسمي في اللي حصل، ولازم نعرف إيه اللي دار في غرفة الفار، وكمان يتحقق في التجاوزات اللي صدرت من الحكم تجاه اللعيبة بعد الماتش.
وأكمل: الحكم محمود وفا كان بيدوّر على أي زاوية تثبت إنها مش ضربة جزاء، ولما ملقاش برضه راح لاغي الكرة، أنا محتاج أفهم إيه الحوار اللي دار بينه وبين غرفة الفار؟
واختتم عبد الحفيظ تصريحاته قائلا: أتمنى مشوفش محمود وفا حكم المباراة فترة طويلة جدًا بعد أداءه في مباراة سيراميكا، وأقسم بالله أول ما محمود وفا راح لتقنية الفيديو لمراجعة لمسة اليد كنت متأكد إنه مش هيحسبها، واختيارات الحكام لإدارة مباريات الدوري فيها شبهة، ومش طبيعي أن الأهلي يطلب حكام أجانب لكل مبارياته في الدوري، وإحنا ممكن نبقي أوحش فريق فالعالم ولكن لينا حقوق لازم أحصل عليها تماما، واللاعب اللي هيشتري الأهلي.. الأهلي هيشتريه.
